బీహార్లో రౌడీ మూకలు తుపాకులతో స్వైర విహారం చేశారు. ఆర్జేడీ చీఫ్ లాలూ ప్రసాద్ యాదవ్ పుత్రరత్నం తేజస్వీ యాదవ్‌పై గత ఎన్నికల్లో పోటీచేసి ఓడిన లోక్ జనశక్తి పార్టీ నేత రాకేశ్ తండ్రి, ఆ పార్టీ కీలక నేత బైజ్ నాథీ సింగ్‌ను రౌడీలు తుపాకులతో కాల్చి చంపేశారు. ఈ ఘటన దేశవ్యాప్తంగా కలకలం సృష్టించింది. పాట్నా నుంచి రఘోపూర్ బయల్దేరిన సింగ్‌పై రఘోపూర్ సమీపంలో రౌడీలు విరుచుకుపడ్డారు.
భార్య, కుమారుడు మరో మహిళతో కలిసి ప్రయాణిస్తున్న బైజ్ నాథీ సింగ్ కారును అడ్డగించి రౌడీలు ఏకే-47 తుపాకీతో కాల్పులు జరిపారు. 30 రౌండ్ల పాటు జరిగిన ఈ కాల్పుల్లో.. 15 బుల్లెట్లు సింగ్ శరీరంలోకి దూసుకెళ్లాయి. ఈ దాడిలో గాయపడ్డ ముగ్గురిని ఆసుపత్రికి తరలించేలోపే సింగ్ మరణించగా, ఇద్దరు మహిళల పరిస్థితి విషమంగా ఉంది.
కాహా బీహార్లో శాంతి భద్రతల పరిస్థితి రోజు రోజుకీ క్షీణిస్తోంది. ఇప్పటికే పలు ఇంజినీర్ల హత్యలతో ఆ రాష్ట్రంలోకి గతంలోని గూండారాజ్ ప్రవేశించిందన్న ఆరోపణలు వెల్లువెత్తుతున్నాయి. గడచిన రెండు టెర్మ్‌లలో గూండారాజ్‌ను కూకటివేళ్లతో పెకలించిన ఆ రాష్ట్ర సీఎం నితీశ్ కుమార్, మూడో దఫా లాలూ ప్రసాద్ యాదవ్ నేతృత్వంలోని ఆర్జేడీతో పొత్తు పెట్టుకుని గెలిచిన సంగతి తెలిసిందే.
అయితే ఈ దఫా నితీశ్ కుమార్ అధికార పగ్గాలు చేపట్టిన వెంటనే ఆ రాష్ట్రంలో నేరగాళ్లు రీ ఎంట్రీ ఇచ్చారు. అయితే ఈ ఘటనలో కారులోనే ఉన్న లోక్ జనశక్తి పార్టీ నేత రాకేశ్‌కు గాయాలు కాలేదని పోలీసులు తెలిపారు. మిగిలిన వారి పరిస్థితి విషమంగా ఉందని వైద్యులు చెప్తున్నారు.