మహారాష్ట్ర ముఖ్యమంత్రిగా ఆదిత్య ఠాక్రే నియమితులయ్యే అవకాశాలు ఉన్నట్టు తెలుస్తోంది. ఈ మేరకు శివసేన యువజన విభాగం నాయకుడు రాహుల్ ఎన్ కనాల్ స్పష్టం చేశారు. మహారాష్ట్రలో బీజేపీతో కలిసి శివసేన యువ నాయకుడు ఆదిత్యథాక్రే ముంబైలోని శివాజీ పార్కులో ముఖ్యమంత్రిగా ప్రమాణస్వీకారం చేస్తారని ఆయన ట్వీట్ చేశారు.
దేవుడి ఆశీస్సులతో సీఎంగా ఆదిత్య ఠాక్రే బాధ్యతలు స్వీకరించనున్నారంటూ చేసిన ట్వీట్‌లో 'గాడ్ ఈజ్ గ్రేట్, జై హింద్, జై మహారాష్ట్ర' అంటూ రాహుల్ ట్వీట్‌లో పేర్కొన్నారు. జూనియర్ ఠాక్రే ఫోటో పెట్టి, 'ఒక రోజు శివాజీ పార్కులో ఠాక్రే మనవుడు దేవుడి పేరిట ప్రమాణస్వీకారం చేస్తారు' అని మరాఠీలో ట్వీట్ చేశారు.
29 ఏళ్ల ఆదిత్య ఠాక్రే ముంబైలోని వర్లీ అసెంబ్లీ నియోజకవర్గం నుంచి పోటీ చేసి తన సమీప ప్రత్యర్థి అయిన ఎన్సీపీకి చెందిన సురేష్ మానీపై 67 వేల ఓట్ల తేడాతో విజయం సాధించారు. ఠాక్రే కుటుంబం నుంచి మొట్టమొదటిసారి ఎన్నికైన ఆదిత్య ఠాక్రే కాబోయే సీఎం అంటూ పోస్టర్లు వేశారు.