Mumbai Boat Accident: ప్రయాణికుల బోటును నేవీ బోటు ఢీకొట్టడంతో 13 మంది మృతి, పలువురు గల్లంతు (video)

Mumbai Boat Accident గేట్‌వే ఆఫ్ ఇండియా నుంచి ఎలిఫెంటా వెళ్తున్న ప్రయాణీకుల పడవను నేవీ బోటు ఢీకొట్టింది. ఈ ఘటనలో ఇప్పటివరకూ 13 మంది మరణించినట్లు మహారాష్ట్ర ముఖ్యమంత్రి దేవేంద్ర ఫడ్నవిస్ వెల్లడించారు. పడవలో మొత్తం ఎంతమంది వున్నారన్నది ఇంకా నిర్థారణ కాలేదు. ఇప్పటివరకూ 101 మందిని రక్షించారు. గాయపడినవారిని వివిధ ఆసుపత్రులకు తరలించి చికిత్స అందిస్తున్నారు. బోటు ప్రమాదం, ఆ తర్వాత ప్రారంభమైన రెస్క్యూ ఆపరేషన్ వీడియోలు సోషల్ మీడియాలో షేర్ అవుతున్నాయి. నేవీ స్పీడ్ బోటు ప్రయాణీకుల పడవను ఢీకొనడంతో ఈ ప్రమాదం జరిగింది.

నీల్కమల్ అనే పడవ గేట్‌వే ఆఫ్ ఇండియా నుండి ఎలిఫెంటాకు మధ్యాహ్నం 3 గంటలకు బయలుదేరింది. ఈ పడవ సామర్థ్యం 130 మంది ప్రయాణికులు. ప్రమాద సమయంలో పడవలో 100 మందికి పైగా ప్రయాణికులు ఉన్నారు. ఉరాన్‌లోని కరంజా ప్రాంతంలో పడవను నేవీ స్పీడ్ బోట్ ఢీకొట్టింది. స్పీడ్ బోట్ అధిక వేగంతో ప్రయాణీకుల పడవ చుట్టూ తిరిగింది. ఆ తర్వాత కొంత దూరం వెళ్లి చాలా వేగంగా జిగ్‌జాగ్ మలుపులో తిరిగి వచ్చి ప్రయాణికుల పడవను బలంగా ఢీకొట్టింది. ఐతే ఇలా ఎందుకు చేసారన్నది తెలియాల్సి వుంది.

ప్రమాదానికి గురైన నీల్‌కమల్‌ బోటులోని వారిని రక్షించేందుకు సీఐఎస్‌ఎఫ్ బోట్ షేరా 1 మొదట చేరుకుంది. ఈ బోటులో కేవలం ఇద్దరు జవాన్లు మాత్రమే ఉన్నారు. ప్రయాణీకుల పడవ పగిలి మునిగిపోతుందని గుర్తించిన వెంటనే సహాయక చర్యలు ప్రారంభించారు. సహాయం కోసం ప్రయాణికులు కేకలు వేశారు.