ఇంట్లో 26 పిల్లలకు జన్మనిచ్చిన కోబ్రా... హడలిపోయిన కుటుంబ సభ్యులు

సాధారణంగా కోబ్రా (త్రాచు పాము)ను చూస్తే ప్రతి ఒక్కరూ వణికిపోతారు. అలాంటి కోబ్రా ఏకంగా ఇంట్లో చేరి 26 పిల్లలకు జన్మనిస్తే.... ఈ విషయం తెలిసిన ఆ ఇంటి కుటుంబ సభ్యులు ఎలా ఉన్నారు. 

తాజాగా వెలుగులోకి వచ్చిన ఈ వివరాలను పరిశీలిస్తే, ఎక్కడి నుంచి వ‌చ్చిందో, ఎలా వ‌చ్చిందోగానీ ఓ ఇంట్లో ఓ నాగుపాము స్వేచ్ఛగా నివాస స్థావరాన్ని ఏర్పరుచుకుంది. ఆ ఇంట్లోనే గుడ్లు పెట్టి పిల్లలను కూడా చేసింది. 

అది ఒకటి రెండు కాదు.. ఏకంగా 26 పిల్లలను చేసింది. అయినా కానీ ఆ ఇంట్లో వారికి పాము కంట‌ప‌డ‌లేదు. ఎవ‌రికీ ఎలాంటి హాని కూడా తలపెట్టలేదు.ఇన్నాళ్లూ గుట్టుచ‌ప్పుడు కాకుండా ఉన్న పాము శుక్రవారం.. ఆ ఇంటి య‌జ‌మాని కంట‌ ప‌డింది. 

దీంతో ఆ ఇంట్లో ఉన్న కుటుంబసభ్యులందరూ భయంతో పరుగులు తీశారు. ఇంటి య‌జ‌మాని ఫిర్యాదు తర్వాత అక్కడకు చేరుకున్న అట‌వీ సిబ్బంది ఆ తాచు పామును బంధించారు. ఆ పాముతోపాటు మొత్తం 26 పిల్లలు కూడా ఉన్నట్లు గుర్తించి అటవీ శాఖ అధికారులు ఆశ్చర్యపోయారు.

త‌ల్లి పాముతోపాటు 26 పిల్లలను పట్టుకొని ఓ సంచిలో బంధించారు. ఆ తర్వాత స‌మీప అట‌వీ ప్రాంతంలో వ‌దిలేసినట్లు కలహండి అటవీ శాఖ స్నేక్ క్యాచర్ బీరేంద్ర కుమార్ సాహు వెల్లడించారు. ఈ షాకింగ్ సంఘటన ఒడిశా రాష్ట్రం క‌ల‌హండి జిల్లాలోని ఓ గ్రామంలో ఈ ఘ‌ట‌న చోటుచేసుకుంది.