ముంబై మహానగరంలో కరోనా వైరస్ విలయతాండవం చేస్తోంది. దీంతో కఠిన ఆంక్షలను అమలు చేస్తున్నారు. లాక్డౌన్ అమలవుతోంది. రాత్రి పూట కర్ఫ్యూ అమల్లో వుంది. దీంతో అనేక ప్రేమికులు తమతమ ప్రియుళ్లు, ప్రియురాళ్లను కలుసుకోలేక పోతున్నారు. ఇలాంటివారిలో ఒకరు... తన ప్రేయసిని కలుసుకునేందుకు ముంబై పోలీసుల సాయం కోరాడు. తన ట్విటర్ వేదికగా ఓ ట్వీట్ చేశాడు. 'నా గర్ల్ ఫ్రెండ్‌ను చూడకుండా ఉండలేకపోతున్నాను. ఆమెను మిస్ అవుతున్నాను. అందుకే, బయటకు వెళ్లి ఆమెను కలవడానికి నేను నా వాహనానికి ఏ స్టిక్కర్ ఉపయోగించాలి?' అంటూ ట్వీట్ చేశాడు.
దీనికి ముంబై పోలీసులు అంతే వేగంతో ఫన్నీగా సమాధానం ఇచ్చారు. 'ఇది మీకు చాలా అవసరం అని మేము అర్థం చేసుకున్నాము, కానీ దురదృష్టవశాత్తు ఇది మా నిత్యావసరాలు లేదా అత్యవసర వర్గాల పరిధిలోకి రాదు! దూరం హృదయాన్ని బాగా విశాలం చేస్తుంది. మీరు ప్రస్తుతం చాలా ఆరోగ్యంగా ఉన్నారు. అలానే ఉండండి' అంటూ చెప్పారు. అంతేకాదు 'మేము మీ ఇద్దరూ కలిసి జీవితకాలం ఉండాలని కోరుకుంటున్నాము. అందులో ఇది ఒక దశ మాత్రమే' అంటూ ముక్తాయించారు.
దీంతో ఈ ట్వీట్ ఇప్పుడు వైరల్ గా మారింది. దీనికి ట్విట్టర్ లో చాలా మంది స్పందించారు అందరూ, ముంబయి పోలీసులు ఇచ్చిన వేగవంతమైన, సున్నితమైన సమాధానం ఇచ్చినందుకు తెగ మెచ్చుకుంటున్నారు.