మంటల్లో కాలిపోతూ యువతిని గట్టిగా హత్తుకున్న యువకుడు

మంటల్లో కాలిపోతున్న యువకుడు ఒకరు ఓ యువతిని గట్టిగా హత్తుకున్నాడు. ఈ ఘటన మహారాష్ట్రలోని ఔరంగాబాద్‌లో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే, డాక్టర్ బాబా సాహెబ్ అంబేద్కర్ మరఠ్వాడ విశ్వవిద్యాలయంలో పీహెచ్‌డీ చదువుతున్న విద్యార్థి ఒకరు తన శరీరంపై పెట్రోల్ పోసుకుని నిప్పంటించుకుని ఆత్మహత్యాయత్నానికి పాల్పడ్డాడు. మంటల్లో కాలుతూనే తాను ప్రేమిస్తున్న యువతిని గట్టిగా హత్తుకున్నాడు. దీంతో ఆ యువతికి కూడా మంటలు అంటుకుని.. వారిద్దరూ మంటల్లో సజీవ దహనమయ్యారు. ఈ ఘటన యూనివర్శిటీలో సంచలనం సృష్టించింది. 

గజానన్ ముండే అనే యువకుడు యూనివర్శిటిలో తనతో పాటు చదువుతున్న యువతిని ప్రేమిస్తున్నాడు. అయితే, ఆ యువతి మాత్రం అతని ప్రేమను నిరాకరించింది. పైగా, ఇటీవల పోలీసులకు కూడా ఫిర్యాదు చేసింది. తనను గజానన్ వేధిస్తున్నాడంటూ ఫిర్యాదు చేయడంతో పోలీసులు అతన్ని మందలించారు. ఈ క్రమంలో ఆ యువతి తనను అన్ని విధాలుగా వాడుకుందని ఆరోపించారు.

ఈ నేపథ్యంలో ఆ యువతి ఒక్కటే ల్యాబ్‌లో ప్రాజెక్టు చేస్తుండగా, అక్కడకు వెళ్లిన గజానన్ ల్యాబ్ తలుపులన్నీ మూసివేసి.. తనతో పాటు తెచ్చుకున్న రెండు పెట్రోల్ బాటిళ్లలో ఒకటి తనపై పోసుసుకుని మరొకటి ఆ యువతిపై పోసి నిప్పంటించుకున్నాడు. ఆ తర్వాత ఆ యువతిని గట్టిగా హత్తుకున్నాడు. దీంతో వారిద్దరూ మంటల్లో కాలిపోయారు. వీరిని ఆస్పత్రికి తరలించగా, వారిద్దరూ చనిపోయారు. పోలీసులు కేసు నమోదు చేసి దర్యాప్తు జరుపుతున్నారు.