కర్ణాటక మంత్రి ఓ వినూత్న కార్యక్రమానికి శ్రీకారం చుట్టనున్నారు. ప్రజల్లో మూఢ నమ్మకాలపై చైతన్యం కలిగించేందుకు ఆయన ఒక రోజు రాత్రి శ్మశానంలో నిద్రించాలని నిర్ణయించారు. ఆ మంత్రి పేరు సతీష్ జర్కిహోళి. ఎక్సైజ్ శాఖా మంత్రివర్యులు.
గతంలో కర్ణాటకలో జేడీ (ఎస్) అధికారంలో ఉన్న సమయంలో అప్పటి ముఖ్యమంత్రి హెచ్‌డి. కుమారస్వామి 'గ్రామాల్లో బస' కార్యక్రమాన్ని చేపట్టారు. గ్రామాభివృద్ధిలో భాగంగా ఆ కార్యక్రమానికి రూపకల్పన చేశారు. అప్పట్లో ఇది బాగా ఆదరణ పొందింది. ఇప్పుడు ఆ కార్యక్రమానికి కాస్త అటూఇటూగా మార్చారు.
ప్రజల్లో మూఢనమ్మకాలపై చైతన్యం తీసుకువచ్చేందుకు ఆయన శ్మశానంలో ఓ రాత్రి గడపాలని నిశ్చయించుకున్నారు. బెళగావి నగరంలో డిసెంబర్ 6వ తేదీన అంబేద్కర్ వర్థంతిని పురస్కరించుకుని, వైకుంఠధామ్ శ్మశాన వాటికలో నిద్రించేందుకు ఏర్పాట్లు చేసుకున్నారు.
దీనిపై మంత్రి మాట్లాడుతూ, తనకు ఈ ఆలోచన ఎప్పటి నుంచో ఉందని, మూఢనమ్మకాలకు వ్యతిరేకంగా తన ప్రచారం బెళగావి నుంచి మొదలవుతుందని చెప్పారు. ఈ కార్యక్రమానికి రాజకీయనేతలను ఎవరినీ పిలవడంలేదని తెలిపారు. ప్రజల్లో అవగాహన కలిగించేందుకు శ్మశానమే అత్యుత్తమ ప్రదేశమని అభిప్రాయపడ్డారు.