2012 డిసెంబర్ నెలలో దేశ రాజధాని న్యూఢిల్లీలో కదిలే బస్సులో వైద్య విద్యార్థినిపై జరిగిన దారుణమైన గ్యాంగ్ రేప్ ఘటనపై నిందితుల్లో ఒకడైన ముఖేష్ ఇచ్చిన ఇంటర్వ్యూపై నిర్భయ తండ్రి ఆగ్రహం వ్యక్తం చేశారు. తన పిల్లలకు తను సొంతగా బతకడం నేర్పాననీ, నిందితుడు ముఖేష్ సింగ్ చెబుతున్నవి అతడి మానసిక స్థితి ఏ స్థాయిలో ఉందో అర్థమవుతుందని అన్నారు.
కాగా ఢిల్లీ గ్యాంగ్ రేప్ ఘటన తర్వాత దేశ వ్యాప్తంగా ఆగ్రహ జ్వాలలు రేగడంతో నిర్భయ చట్టాన్ని తెచ్చింది అప్పటి యూపీఎ ప్రభుత్వం. దాని ప్రకారం నిర్భయ నిందితులకు శిక్ష కూడా ఖరారైంది. ఐతే నిర్భయ కేసు నిందితుడు ముఖేష్ సింగ్ మొన్న మహిళా దినోత్సవం సందర్భంగా చేసిన సంచలన వ్యాఖ్యలు ఇప్పుడు తీవ్ర చర్చనీయాంశంగా మారాయి. అతడు బీబీసికి ఇచ్చిన ప్రత్యేక ఇంటర్వ్యూలో మాట్లాడుతూ... "ఆడవారు రేప్‌లు చేస్తే చేయించుకోవాలి.
అసలు వాళ్ళకు అర్థరాత్రి పూట ఏం పని. ఎందుకు అర్థరాత్రి పూట తిరగాలి. ఇంట్లో వారికి వీరు ఏమని చెప్పి బయటకు వస్తున్నారు. అర్థరాత్రి దాటాక కూడా మగాళ్లతో బయట తిరుగుళ్లు ఏంటి. అత్యాచార విషయాల్లో మగాళ్లనే తప్పుపడుతుంటారు కానీ అందులో ఆడవాళ్లకు కూడా భాగం ఉంటుంది. కేవలం ఒక్క చేత్తో చప్పట్లు కొట్టలేము. అబ్బాయిలు, అమ్మాయిలు పబ్బులు, డిస్కోలకు విచ్చలవిడిగా తిరిగితే ఫర్వాలేదా? అర్థ నగ్నంగా దుస్తులు వేసుకుని తిరుగుతుంటే ఏ మగాడైనా చూస్తూ ఊరుకుంటాడా?.
అబ్బాయిలు, అమ్మాయిలు సమానమైనప్పుడు ఉరిశిక్ష ఎందుకు. అలా ఉరిశిక్షలు విధిస్తే బాధిత మహిళలకు ప్రాణహాని ఉంటుంది. నిర్భయను బలాత్కరిస్తున్నప్పుడు ఆమె మౌనంగా ఉండాల్సింది. ఎలాంటి ప్రతిఘటనా చేకుండా ఉండాల్సింది. ఆమెపై అత్యాచారం చేసినప్పుడు నేను బస్సు నడుపుతున్నా. ఆడవారు గౌరవంగా ఇంట్లో ఉంటే ఎవరికీ వారిని ఏమీ చేయాలనిపించదు" అంటూ ఉరి శిక్ష పడినప్పటికీ ఎలాంటి పశ్చాత్తాపం లేకుండా వివరించాడు నిర్భయ నిందితుడు ముఖేష్.