ఈవ్ టీజింగ్‌పై ఎన్ని చట్టాలు తెచ్చినా ఆకతాయిల ఆగడాలు ఆగడం లేదు. ఈ విషయంలో పోలీసులు మెతకవైఖరి చూపుతున్నట్టు ఆరోపణలు కూడా వినిపిస్తున్నాయి. ఇటీవల ఈవ్ టీజింగ్ చేసే వారిపై బాధితులే ఎదురుదాడికి తిరుగుతున్నారు. ఈవిధంగా తాజాగా మరో సంఘటన చోటు చేసుకుంది. వివరాల్లోకి వెళితే.. ఉత్తర ప్రదేశ్‌లోని ఫిలిబిత్‌లో స్నేహితులతో కలిసి స్కూలుకెళుతున్న ఓ బాలికను కొంతమంది ఆకతాయిలు టీజ్ చేశారు.
అయినా ఆ బాలిక ఎంతో ఓర్పుతో సహిస్తూ వచ్చింది. దీంతో మరింత రెచ్చిపోయిన ఆకతాయిలు బూతు పదాలను వాడటం మొదలెట్టారు. ఇక తల వంచుకుంటే లాభం లేదనుకున్న ఆ బాలిక స్నేహితులతో కలిసి ఇద్దరు ఆకతాయిలను కట్టేసి పోలీసులకు పట్టించింది. అయినా తనను అంతగా వేధించిన వారిని అలా వదిలేశామే అనే బాధ ఆ బాలికను ఉండబట్టనివ్వలేదు.
దీంతో వెంటనే ఆ బాలిక ఇదే విషయాన్ని తండ్రికి చెప్పి, ఆయనతో కలిసి పోలీస్ స్టేషన్‌కు వెళ్లింది. అనంతరం ఆ బాలిక తన బాధను పోలీసులకు చెప్పి, అనుమతి పొందింది. తనపై బూతు మాటలు విసిరిన ఆకతాయిని పట్టుకుని చెంపలు వాయించింది. అయినా కసి తీరక పిడిగుద్దులతో చితకబాదింది. అంతటితో ఆగక ఇక భవిష్యత్తులో మరే బాలికనూ వేధించనని చెప్పమంటూ ఆ ఆకతాయిల చేత మాట పలికించింది.
బాలిక ఉగ్రరూపానికి బెంబేలెత్తిన ఆకతాయిలు ఆమె కాళ్లు పట్టుకున్నారు. కాగా ఈ ఘటనకు సంబంధించిన వీడియో ప్రస్తుతం నెట్‌లో హల్‌చల్ చేస్తోంది. దీనికి పెద్ద సంఖ్యలో లైక్స్ కూడా వస్తున్నాయి.