ఆశ్రయం కోసం వెళ్తే అఘాయిత్యం చేశాడు.. భార్య ఫ్రెండ్‌ని గర్భవతి చేసిన భర్త

తలదాచుకుందామని స్నేహితురాలి ఇంటికెళ్తే, ఆమె భర్త చేసిన పనికి ఓ యువతి గర్భందాల్చింది. ఈ ఘటన బెంగుళూరులో చోటుచేసుకుంది. ఇది గతేడాది జరుగగా బాధితురాలు పోలీసులకు ఫిర్యాదు చేయడంతో తాజాగా వెలుగులోకి వచ్చింది. 

ఓ యువతి బెంగుళూరులోని ఓ చిట్‌ఫండ్ కంపెనీలో తన నగదును డిపాజిట్ చేసింది. తన అవసరాల కోసం అపుడపుడూ డ్రా చేసుకునేందుకు బెంగుళూరుకు వెళ్ళాల్సి వచ్చేది. ఇదేవిధంగా గతేడాది డిసెంబరు నెలలో డబ్బులు డ్రా చేయడానికి బెంగుళూరు వెళ్లింది. అది తీసుకోవడానికి ఆలస్యమైంది. ఆ సమయంలో బస్సులో ప్రయాణించడం క్షేమం కాదని భావించింది. వెంటనే బెంగుళూరులో ఉన్న ఆమె స్నేహితురాలి ఫోన్ చేసి ఆమె ఇంటికి వెళ్లింది. 

ఆ రోజు రాత్రి అక్కడే బస చేసింది. మరుసటిరోజు ఉదయాన్నే స్నేహితురాలు ఆఫీసుకు వెళ్లిపోయింది. ఇదే అదునుగా భావించి స్నేహితురాలి భర్త.. యువతిపై అత్యాచారానికి తెగబడ్డాడు. ఈ విషయం తన భార్యకు చెబితే చంపేస్తానని బెదిరించాడు. దీంతో ఆ యువతి మిన్నకుండిపోయింది. మూడు నెలల తర్వాత ఆ యువతి గర్భందాల్చింది. దీంతో మరోమార్గం లేక పోలీసులను ఆశ్రయించడంతో ఈ విషయం వెలుగులోకి వచ్చింది. దీనిపై పోలీసులు కేసు నమోదు చేసి విచారణ జరుపుతున్నారు.