చెడు తిరుగుళ్లు తిరిగే భర్త నుంచి హెర్పిస్ వ్యాధి సోకింది... ఏం చేయను?

కట్టుకున్న భర్తపై ఓ భార్య పోలీసులకు ఫిర్యాదు చేసింది. చెడు తిరుగుళ్లు తిరిగే తన భర్త నుంచి తనకు హెర్పిస్ వ్యాధి (లైంగిక సంక్రమణ వ్యాధి) సోకిందని అందులో పేర్కొంది. ఈ విషయాన్ని ప్రస్తావిస్తే తనను పట్టుకుని కొడుతూ చిత్రహింసలు పెడుతున్నాడని పేర్కొంది. 

ఈ ఘటన గుజరాత్ రాష్ట్రంలో వెలుగు చూసింది. తాజాగా వెలుగులోకి వచ్చిన ఈ వివరాలను పరిశీలిస్తే, అహ్మదాబాద్ నగరంలోని వెజల్ పూర్ ప్రాంతానికి చెందిన 36 ఏళ్ల వివాహిత లాక్డౌన్ సమయంలో తన భర్త నుంచి హెర్పిస్ వ్యాధి సోకిందని ఆరోపించారు. 

2017 మేలో మేనెక్ బాగ్ నివాసిని తాను వివాహమాడానని, అతను తాగుబోతు అని, ఇతర మహిళలతో అక్రమ సంబంధాలున్నాయని భార్య పోలీసులకు ఫిర్యాదు చేసింది. 

తన భర్త శరీరంపై పుండ్లు ఉన్నాయని, ఆయన నుంచి తనకు లైంగిక సంక్రమణ వ్యాధి అయిన హెర్పిస్ సోకిందని మహిళ ఆరోపించింది. దీనిపై ప్రశ్నిస్తే భర్త తనను కొట్టి పుట్టింట్లో వదిలేశారని వివాహిత పోలీసులకు సమర్పించిన ఫిర్యాదులో పేర్కొన్నారు. తనకు న్యాయం చేయాలని కోరింది.