ఢిల్లీ గ్యాంగ్ రేప్ బాధితురాలు నిర్భయకు భారతపుత్రిక అవార్డు లభించింది. ఢిల్లీ నడివీధులలో రాక్షస మూక చేతిలో బలైపోయిన జ్యోతిసింగ్ అలియాస్ నిర్భయకు భారతపుత్రిక అవార్డుతో ప్రధానమంత్రి మన్మోహన్ సింగ్ నివాళి అర్పించారు. ఢిల్లీలో జరిగిన ఎన్‌‌డిటివి ఇండియన్స్ ఆఫ్ ధ ఇయర్ అవార్డుల కార్యక్రమంలో నిర్భయ తల్లిదండ్రులకు 'భారత పుత్రిక' అవార్డును ప్రదానం చేసిన అనంతరం ప్రధాని మాట్లాడారు.
నిర్భయ మరణం వృధా కాబోదని... ఆమె మనందరికీ స్ఫూర్తి అని ప్రధాని చెప్పారు. ఇంకా మహిళల రక్షణ, భద్రత కోసం పనిచేస్తామని ప్రధాని ఈ సందర్భంగా హామీ ఇచ్చారు.
కాగా గత ఏడాది డిసెంబర్ 16వ తేదీన నిర్భయ కదిలే బస్సులో నలుగురు కామాంధులచే సామూహిక అత్యాచారానికి గురై సింగపూర్ ఆస్పత్రిలో చికిత్స పొందుతూ ప్రాణాలు కోల్పోయిన సంగతి తెలిసిందే.