కొన్ని పాలసీలు విడదీసినా.. మరికొన్ని పాలసీలు కలుపుతాయ్: భారత్‌పై వైట్ హౌజ్
వీసా రద్దుతో పాటు అవుట్ సోర్సింగ్‌పై వేటు వేసి.. భారతీయులకు అమెరికా అధ్యక్షుడు డొనాల్డ్ ట్రంప్ చుక్కలు చూపిస్తుంటే.. ట్రంప్ యంత్రాంగం భారత్‌తో బలమైన సంబంధాలను కోరుకుంటోందని.. వైట్ హౌజ్ స్పష్టం చేసింది
వీసా రద్దుతో పాటు అవుట్ సోర్సింగ్‌పై వేటు వేసి.. భారతీయులకు అమెరికా అధ్యక్షుడు డొనాల్డ్ ట్రంప్ చుక్కలు చూపిస్తుంటే.. ట్రంప్ యంత్రాంగం భారత్‌తో బలమైన సంబంధాలను కోరుకుంటోందని.. వైట్ హౌజ్ స్పష్టం చేసింది. భారత్- అమెరికాల మధ్య సంబంధాలు మెరుగుపడేందుకు ఇరు దేశాలు కృషి చేస్తాయని విశ్వసిస్తున్నామని వైట్‌హౌస్‌ ప్రెస్‌ సెక్రటరీ సీన్‌ స్పైసర్ ఆకాంక్షించారు. తమ విదేశీ విధానాల పట్ల ముందుకెళ్తున్న క్రమంలో, భారత్‌తో సత్సంబంధాల కొనసాగింపు గురించి అధ్యక్షుడు ట్రంప్ తరచూ ప్రస్తావిస్తారని స్పైసర్ పేర్కొన్నారు.
గతంలో వెల్లడించినట్లే.. భారత ప్రధాని మోడీతో వ్యాపార సంబంధాలను బలపరిచేందుకు కృషి చేస్తామని వెల్లడించారు. కొన్ని పాలసీలు మనల్ని విడదీసినప్పటికీ, మరికొన్ని పాలసీలు మనల్ని కలిపి ఉంచుతాయని స్పైసర్ అన్నారు. కేన్సస్‌లో 32ఏళ్ల తెలుగు యువకుడు శ్రీనివాస్‌ హత్యను స్పైసర్ ఖండించారు. దేశ విలువలను కాపాడేందుకు అమెరికన్లంతా విధానాలకు కట్టుబడి కలిసి ఉండాలని విజ్ఞప్తి చేశారు. అమెరికన్లు ఇలాంటి విద్వేష ఘటనలకు తావివ్వకూడదని స్పైసర్ చెప్పుకొచ్చారు.