ఉక్రెయిన్ - రష్యా దేశాల మధ్య గత కొంతకాలంగా యుద్ధం సాగుతుంది. ఇందులోభాగంగా, ఇరు దేశాలు ఒకరిపై ఒకరు భీకర దాడులు చేసుకుంటున్నారు. రష్యా సైన్యం చేసిన దాడుల్లో ఉక్రెయిన్ చాలా నష్టపోయింది. ఈ క్రమంలో ఉక్రెయిన్‌లోని ఒక స్వచ్ఛంద సంస్థకు కరేలీనా అనే డ్యాన్సర్ విరాళం ఇచ్చింది. దీన్ని రష్యా తీవ్రంగా పరిగణించింది. విరాళం ఇచ్చిన డ్యాన్సర్‌కు ఏకంగా 12 యేళ్ల జైలుశిక్ష విధిస్తూ తీర్పునిచ్చింది. తాజాగా వెలువడిన ఈ తీర్పు వివరాలను పరిశీలిస్తే,
అమెరికా - రష్యన్ పౌరురాలు అయిన క్సేనియా కరేలీనా (32) అమెరికాలోని లాస్ ఏంజెలెస్‌లో ఉంటుంది. ఆమె ఉక్రెయిన్‌కు అనుకూలంగా వ్యవహరించే ఓ స్వచ్ఛంద సంస్థకు ఆమె 50 డాలర్లకుపైగా విరాళం ఇచ్చింది. ఈ విషయాన్ని రష్యా చాలా తీవ్రంగా పరిగణించింది. గత జనవరిలో రష్యాలోని యెకాటెరిన్ బర్గ్‌లో ఉన్న తన కుటుంబాన్ని సందర్శించేందుకు కరేలీనా రష్యాకు వచ్చింది.
ఆ వెంటనే రష్యన్ పోలీసులు ఆమెను అదుపులోకి తీసుకున్నారు. దేశద్రోహానికి పాల్పడిందంటూ ఆమెను పోలీసులు అరెస్టు చేశారు. ఆమెను అరెస్టు చేయడంపై అమెరికా అభ్యంతరం వ్యక్తం చేసింది. తమ పౌరులను నిరాధార ఆరోపణలతో అరెస్టు చేస్తున్నారని విమర్శించింది. ఆమెను విడిపించేందుకు ప్రయత్నించినప్పటికీ... అమెరికా సఫలీకృతం కాలేదు. కోర్టులో కేసు విచారణ సందర్భంగా కరేలీనా నేరాన్ని అంగీకరించిందని రష్యన్ మీడియా తెలిపింది. కరేలీనా దేశద్రోహానికి పాల్పడిందని కోర్టు నిర్ధారించింది. ఆమెకు కోర్టు 12 ఏళ్ల జైలు శిక్షను విధించింది.