పాకిస్థాన్‌కు అమెరికా తేరుకోలేని షాకిచ్చింది. ఉగ్రవాదానికి వంతపాడుతూ వస్తూన్న పాకిస్థాన్ పైకిమాత్రం శ్రీరంగ నీతులు వల్లెవేస్తోంది. పాకిస్థాన్ అండతో పెట్రేగిపోతున్న ఉగ్రవాద సంస్థ హక్కానీ నెట్‌వర్క్‌ను అంతం చేసేందుకు గట్టి చర్యలు తీసుకుంటేనే ఆర్థిక సాయం అందిస్తామని అమెరికా తాజాగా తేల్చి చెప్పింది.
అమెరికా ఇటీవల ప్రకటించిన రూ.6,121 కోట్లలో సాయంలో తొలి విడతగా రూ.2.7 వేల కోట్లు అందజేయాల్సి ఉంది. సంకీర్ణ మద్దతు నిధి (సీఎస్ఎఫ్) కింద పాకిస్థాన్‌కు సాయం అందిచించే రక్షణ బిల్లు ఎన్‌డీఏఏ-2017కు అమెరికా హౌస్ ఆఫ్ రిప్రజెంటేటివ్స్ కూడా మద్దతు తెలిపింది. ఏకాభిప్రాయంతో కూడిన బిల్లు కావడంతో తాజాగా ఇది అమెరికా సెనేట్‌లోనూ ఆమోదం పొందింది.
అయితే ఈ చట్టం ప్రకారం పాకిస్థాన్ హక్కానీ నెట్ వర్క్ విషయంలో ఆఫ్ఘనిస్థాన్‌కు సహకరిస్తూ ఉగ్రకార్యకలాపాలపై కఠిన చర్యలు తీసుకుంటున్నట్టు అమెరికా రక్షణ మంత్రిత్వ శాఖ సర్టిఫికెట్ ఇస్తేనే ఈ సాయం అందుతుంది. దీంతో 2016కు సంబంధించిన సాయం అందించేందుకు కావాల్సిన సర్టిఫికేట్ ఇచ్చేందుకు అమెరికా రక్షణ మంత్రి ఆష్టన్ కార్టర్ నిరాకరించారు.
ఫలితంగా పాకిస్థాన్‌కు అందాల్సిన రూ.2 వేల కోట్ల సాయం నిలిచిపోయింది. తాజాగా సెనేట్‌లో ప్రవేశపెట్టిన ఎడీఏఏ-2017 బిల్లుపై కూడా రక్షణ మంత్రి సర్టిఫికెట్ ఇస్తేనే అంటూ అమెరికా కాంగ్రెస్ షరతు విధించింది. ఈ విషయంలో అమెరికా అధ్యక్షుడు కూడా జోక్యం చేసుకునే వెసులుబాటు లేకపోవడంతో పాకిస్థాన్ పరిస్థితి కుడితిలో పడిన ఎలుక చందంగా మారింది.