పెషావర్ సైనిక పాఠశాలలో మారణహోమం సృష్టించిన తెహ్రీక్ ఏ తాలిబన్ పాకిస్థాన్‌ను పాకిస్థాన్ సైన్యం దెబ్బకు దెబ్బ కొట్టింది. సైనిక పాఠశాలలో మారణహోమం సృష్టించి 150 మంది అమాయక చిన్నారులను క్రూరాతిక్రూరంగా పొట్టన పెట్టుకున్న ఘటనలో ప్రధాన సూత్రధారి తెహ్రీక్-ఏ-తాలిబాన్ అధినేత మౌలానా ఫజులుల్లాను పాక్ సైన్యం హతమార్చినట్టు పాక్ మీడియా వెల్లడిస్తోంది.
శనివారం ఉదయం తాలిబాన్ స్థావరాలపై అమెరికాతో కలిసి పాకిస్థాన్ సైన్యం నిర్వహించిన డ్రోన్ దాడుల్లో ఆయన మరణించినట్టు పాకిస్థాన్ మీడియాలో వార్తలు వెలువడ్డాయి. ఈ విషయమై ప్రభుత్వం నుంచి అధికారిక స్పందన వెలువడాల్సి ఉంది. ఆఫ్ఘనిస్థాన్‌, పాకిస్థాన్ నిర్వహించిన సంయుక్త వైమానికదాడిలో ఫజిలుల్లాను సైన్యం మట్టుబెట్టినట్లు సమాచారం.