ఫ్రీ బేసిక్స్‌కు ట్రాయ్ రెడ్ సిగ్నెల్ వేసింది. దీనిపై ఫేస్‌బుక్ అధినేత మార్క్ జుకెర్ బర్గ్ తీవ్ర నిరాశకు లోనయ్యారు. నెట్ న్యూట్రాలిటీకి పచ్చజెండా ఊపిన ట్రాయ్... ఫ్రీ బేసిక్స్ లాంటి వేర్వేరు టారిఫ్‌ల ఇంటర్నెట్‌‌కు ససేమిరా అంది. ఈ మేరకు స్పష్టమైన విధివిధానాలతో కూడా ఉత్తర్వులు జారీ చేసింది.
ఇలా ట్రాయ్ నిర్ణయం వెలువడిందో, లేదో... అటు మార్క్ జుకెర్ బర్గ్ వేగంగా స్పందించారు. ట్రాయ్ నిర్ణయం తనను తీవ్ర నిరాశకు గురి చేసిందని ఆయన ఫేస్‌బుక్‌లో ఓ పోస్ట్ పెట్టారు. అయినప్పటికీ, నిర్దేశించుకున్న గమ్యాన్ని చేరుకునే విషయంలో రాజీ పడబోనని ఆయన ప్రకటించారు. బహుళ ప్రయోజనాలున్న 'ఇంటర్నెట్. ఆర్గ్'ను ఒక్క భారతదేశంలోనే కాక విశ్వవ్యాప్తంగా ఆమోదం పొందేలా చేయడమే తన కర్తవ్యమన్నారు.
కాగా, 'ఫ్రీ బేసిక్స్' పేరిట భారత ఇంటర్నెట్ వినియోగదారులను తన చెప్పుచేతల్లో ఉంచుకునేందుకు తాను కుట్ర పన్నలేదని చెప్పుకొచ్చారు. ఫేస్‌బుక్ చీఫ్ మార్క్ జుకెర్ బర్గ్ చేసిన యత్నాలకు టెలికాం రెగ్యులేటరీ అథారిటీ ఆఫ్ ఇండియా (ట్రాయ్) సోమవారం బ్రేకులు వేసిన విషయంతెల్సిందే.