సింహాల్లాగే కోరలు,, చిరుతపులికున్న వేగం.. జంతువు కనిపిస్తే వేటాడి నలిమి మింగే పాములు.. ఆశ్చర్యంగా ఉంది కదూ.. కానీ ఇది నిజమని పరిశోధకులు చెబుతున్నారు. క్రూర జంతువులకు ఉండాల్సిన అన్ని లక్షణాలు వాటికి ఉండేవని వారు బల్లగుద్ది మరీ చెబుతున్నారు. కాలక్రమేణ మార్పుల కారణంగా పాములు పాకేవిగా మారిపోయాయని అంటున్నారు. వివరాలిలా ఉన్నాయి.
పాముల పూర్వీక జాతికి కాళ్లుండేవట. ఇవి కూడా జంతువుల మాదిరి వేటాడేవట. ఈ వేటాడే పాముల నుంచి ఇప్పుడున్న దాదాపు 3 వేలకు పైగా పాము జాతులు ఉద్భవించాయని తాజాగా చేసిన పరిశోధనల్లో తేలింది. అవి వాటికున్న హుక్‌లాంటి పళ్లను ఉపయోగించి వేటాడేవని చెబుతున్నారు.
వీటికి వెనుక కాళ్లకు బొటనవేలు, మడమలు ఉండేవని, కాకపోతే అవి కదిలేందుకు సహకరించి ఉండకపోవచ్చని అంటున్నారు. దాదాపు 73 సర్ప జాతుల శిలాజాలు, జన్యు క్రమం, శరీర నిర్మాణాలను పోల్చి చూశాక యేల్ యూనివర్సిటీకి చెందిన శాస్త్రవేత్తలు ఈ విషయాన్ని ధ్రువీకరించారు. దాదాపు 12.85 కోట్ల సంవత్సరాల కింద ఈ పాము జాతులే రాజ్యమేలాయిని శాస్త్రవేత్తలు అభిప్రాయపడుతున్నారు.