చైనాపై అనేక ప్రపంచ దేశాలు ఉక్కపాదం మోపుతున్నాయి. ఇటీవలి కాలంలో చైనా దుందుడుకు చర్యలకు పాల్పడుతుండటంతో అనేక ప్రపంచ దేశాలు గుర్రుగా ఉంటున్నాయి. ముఖ్యంగా, భారత్, అమెరికా, జపాన్, జర్మనీ వంటి దేశాలు చైనాపై ఆగ్రహాన్ని వ్యక్తం చేస్తున్నాయి. ఈ క్రమంలో చైనాకు చెందిన అనేక యాప్‌లపై భారత్ నిషేధం విధించింది. ఇపుడు ఇదే బాటలో అమెరికా కూడా నడిచింది.
నిజానికి ఇప్పటికే చైనా - అమెరికా దేశాల మధ్య వాణిజ్య యుద్ధం సాగుతోంది. అమెరికాను ఆర్ధికంగా దెబ్బకొట్టాలని చైనా చూస్తోందని అమెరికా అధినేత డోనాల్డ్ ట్రంప్ పదేపదే ఆరోపణలు చేస్తున్నారు. అందులోభాగంగానే చైనా కరోనా అనే బయో వైరస్‌ను వుహాన్ ప్రయోగశాలో తయారు చేసిందని బాహాటంగానే ఆరోపించారు.
ఈ క్రమంలో టిక్‌టాక్, వీ చాట్ వంటి మాధ్యమాల ద్వారా అమెరికన్ పౌరుల విలువైన సమాచారాన్ని ఆయా కంపెనీలు చైనా కమ్యూనిస్ట్ ప్రభుత్వానికి అందజేస్తున్నాయని అధ్యక్షుడు ట్రంప్ ఆరోపిస్తూ వాటిపై నిషేధం విధిస్తు ఎగ్జిక్యూటివ్ ఆర్డర్‌పై సంతకం చేశారు. 45 రోజుల్లోగా ఈ నిషేధం అమల్లోకి వస్తుంది.
ఇప్పటికే చైనాకు సంబంధించిన అనేక యాప్స్‌పై ఇండియా ఇప్పటికే నిషేధం విధించింది. మరో 250 రకాల యాప్స్‌ను మానిటరింగ్‌లో పెట్టింది. ఏ క్షణంలో వీటిపై నిషేధం విధిస్తారో తెలియదు. ఇప్పుడు అమెరికా సైతం టిక్ టాక్, వీ చాట్‌లపై నిషేధం విధించటంతో మిగతా దేశాలు కూడా ఈ దిశగా ఆలోచన చేస్తున్నట్టు సమాచారం.