శత్రుదేశం చైనాను హైదరాబాద్ వణికిస్తోంది. దీనికి కారణమేంటో తెలుసా? భారత రక్షణ శాఖ తయారు చేసిన ఖండాంతర క్షిపణిని భాగ్యనగరంలోనే తయారు చేసింది. 5 వేల కిలోమీటర్ల దూరంలోని లక్ష్యాలను తుత్తినియలు చేయగల శక్తిసామర్థ్యాలున్న ఈ క్షిపణి రూపు దిద్దుకున్నది హైదరాబాద్‌లోని కంచన్‌బాగ్‌లోనే కావడం గమనార్హం. దీంతో చైనా పాలకులకు కంటిమీద కునుకు లేకుండా పోయింది.
సోమవారం అగ్ని-5 ఇంటర్ కాంటినెంటల్ బాలిస్టిక్ మిసైల్‌ను నాలుగోసారి ఒడిశాలోని వీలర్ ఐలండ్‌లో పూర్తిస్థాయిలో విజయవంతంగా పరీక్షించారు. ఈ పరీక్ష పూర్తిగా విజయవంతమైందని డీఆర్‌డీవో పేర్కొంది. ఈ పరీక్షతో భారత్ అమెరికా, బ్రిటన్, రష్యా, చైనా, ఫ్రాన్స్ సరసన చేరింది. ఈ విజయం వెనక కంచన్‌బాగ్‌లోని డిఫెన్స్ ల్యాబరేటరీ కృషి ఎంతగానో ఉంది.
ఈ క్షిపణి డిజైన్ నుంచి అభివృద్ధి వరకంతా హదరాబాద్‌లోనే జరిగింది. 200 మందికిపైగా శాస్త్రవేత్తలు ఈ ప్రాజెక్టు కోసం రాత్రింబవళ్లు కష్టపడ్డారు. అగ్ని సిరీస్ క్షిపణుల తయారీలో పాలుపంచుకున్న మరో వందమంది శాస్త్రవేత్తలు కూడా ఇందుకోసం సహాయసహకారాలు అందించారు. మరో ముఖ్యమైన విషయం ఏమిటంటే అగ్ని-5లో ఉపయోగించిన చాలావరకు పరికరాలు హైదరాబాద్‌లోనే తయారు కావడం. ఏపీజే అబ్దుల్ కలాం మిసైల్ కాంప్లెక్స్, అడ్వాన్స్‌డ్ సిస్టమ్స్ ల్యాబరేటరీ(ఏఎస్ఎల్), డిఫెన్స్ రీసెర్చ్ అండ్ డెవలప్‌మెంట్ ల్యాబరేటరీ(డీఆర్‌డీఎల్)లు ఈ మిసైల్ కోసం పనిచేశాయి.
అగ్ని-5 పూర్తిస్థాయిలో సిద్ధమైన తర్వాత హైదరాబాద్ నుంచి దానిని ఒడిశాకు భారీ ట్రక్కుల సాయంతో రోడ్డు మార్గంలో తరలించారు. క్షిపణిని 12కు పైగా భాగాలుగా విడగొట్టి వీలర్ ఐలండ్‌కు చేర్చారు. అనంతరం అక్కడ అసెంబుల్ చేసి పరీక్షించారు. ఈ క్షిపణి విజయంతో భారత అమ్ముల పొదిలోకి మరో శక్తిమంతమైన ఆయుధం వచ్చినట్టయింది. ఇప్పుడు ఈ ఖండాంతర క్షిపణిని చూసి చైనా వణుకుతోంది. దీనికి కారణం డ్రాగన్ కంట్రీ మొత్తం ఈ క్షిపణి పరిధిలోకి రావడమే.