నెలలు నిండకుండా పుట్టే పిల్లలు.. పుడుతూనే ఆరోగ్యపరమైన లోపాలను వెంట తెచ్చుకుంటారు. వీటిలో కొన్ని సమస్యలను వైద్యంతో నయం చేయగలిగినా కొన్ని మాత్రం వాళ్లని జీవితాంతం వేధిస్తాయి. ఇదిలా ఉంటే నెలలు నిండకుండా పుట్టిన బాబు చనిపోయాడనుకుంటే బతికి అందరిని ఆశ్చర్యపరిచాడు. ఈ సంఘటన చైనాలోని జేఝియాంగ్ రాష్ట్రంలో చోటు చేసుకుంది. వివరాలలోకి వెళితే పుట్టుకతోనే ఆరోగ్యలోపాలుండే ఈ చిన్నారిని 23 రోజులుగా ఇంటెన్సివ్‌కేర్ యూనిట్‌లో ఉంచి చికిత్స అందించారు.
ఆరోగ్యం మెరుగుపడడంతో వైద్యులు ఇంటికి పంపించారు. ఓ రాత్రి బాబు ఆరోగ్య పరిస్థితి విషమించడంతో గుండె కొట్టుకోవడం మానేసింది. అనంతరం హాస్పటల్‌కు తీసుకెళ్లారు. పరీక్షించిన వైద్యులు ఆ బాబు ఇకలేడని చెప్పారు. కన్నీరుమున్నీరుతో తల్లిదండ్రులు ఆ బాబు మృతదేహాన్నిశ్మశానవాటికకు తరలించారు. అక్కడ.. 12 డిగ్రీల ఉష్ణోగ్రత వద్ద 15 గంటలపాటు డీప్ ఫ్రీజర్‌లో ఉంచారు. అంత్యక్రియలు నిర్వహించేందుకు మధ్యాహ్నం సమయంలో ఆ బాబును డీప్ ఫ్రీజర్ నుంచి బయటకు తీయడంతోనే.. ఎవరో మూలుగిన చప్పుడు వినిపించడంతో బాబు కొనఊపిరితో కొట్టుమిట్టాడుతున్నది గమనించారు.
వెంటనే ఆ బాబును ఆసుపత్రికి తరలించారు. ప్రస్తుతం ఇంటెన్సివ్ కేర్ యూనిట్‌లో చికిత్స అందిస్తున్నారు. గుండె ఆగిపోయిందని నిర్ధారించిన తర్వాత ఆ పాప మళ్లీ బతకడం వైద్య పరిజ్ఞానానికి అంతుపట్టడం లేదని వైద్యులు అంటున్నారు. ఇదిలా ఉంటే బాబు మృతదేహాన్ని రెండు వరుసల గుడ్డలో.. ఓ మందపాటి బ్యాగులో డీప్ ఫ్రీజర్‌లో భద్రపరచడంతో బాబు బతకగలిగాడని వైద్యులు తెలిపారు.