హాలీవుడ్ అందాల రాశి ఏంజెలీనా జోలీ. ఇప్పుడీ బ్యూటీ బౌద్ధుల ఆగ్రహానికి గురైంది. ఇందుకు కారణం ఆమె వీపుపై వేయించుకున్న ఓ టాటూనే. పురాతన్ ఖ్మేర్ లిపిలో ఉన్న ఆ టాటూ ఎంతో పవిత్రమైనదని, జోలీ దాన్ని అగౌరవపరిచారని థాయ్ లాండ్ లోని బౌద్ధ సంఘాలు ఆగ్రహం వ్యక్తం చేస్తున్నాయి.
2003లో ఆమె థాయ్ టాటూ మాస్టర్‌నూ కాంపాయ్‌తో ఈ టాటూ వేయించుకున్నారు. అయితే, థాయ్ సంస్కృతి ప్రకారం మానవ దేహంలో తల మాత్రమే పవిత్రమైనది. దాంతో, మిగతా భాగాలపై మతపరమైన టాటూలు వేయించుకోవడం, విశ్వాసాలను కించపరచడమేనని అక్కడి వారు భావిస్తారు.
ఏంజెలీనా జోలీ ప్రపంచ ప్రసిద్ధి చెందిన స్టార్ కావడంతో, ఆమెను చూసి ఎందరో వేలంవెర్రిగా ఆ టాటూను వేయించుకునేందుకు ఎగబడతారని బౌద్ధులు ఆందోళన వ్యక్తం చేస్తున్నారు. ఆ టాటూలో ఉన్న వాక్యాల మహత్మ్యం పాశ్చాత్యులకు అర్థం కావడంలేదని వారంటున్నారు. కనుక ఇటువంటి టాటూలపై నిషేధం విధించాలని వారు కోరుతున్నారు. బుద్ధుడిని టాటూల రూపంలో, అలంకరణల రూపంలో ఉపయోగించడం తప్పు అంటూ రాజధాని బ్యాంకాక్‌లో భారీ హోర్డింగ్‌లు ఏర్పాటు చేసి తమ నిరసన వ్యక్తం చేశారు. ఈ సంఘటన అక్కడ పెద్ద దుమారేన్నే రేపుతోంది.