వెంట్రులకు రాలిపోతున్నాయా? సహజసిద్ద పద్ధతులతో చెక్ పెట్టండి!

చాలా మందిలో వెంట్రుకలు రాలిపోతుంటాయి. మానసిక ఒత్తిడి, పౌష్టికాహార లోపం, దీర్ఘకాలిక వ్యాధులు ఉన్నవారిలో ఇలాంటి సమస్యలు అధికంగా ఉంటాయి. ఈ క్రమంలో హెయిర్‌లాస్ సమస్యతో ఇబ్బందులు పడుతున్న వారు దాన్ని ఆపడం కోసం అనేక రకాల ప్రయత్నాలు చేస్తున్నారు. వెంట్రులు రాలడానికి చిన్నపాటి సహజ సిద్ధమైన చిట్కాలు పాటిస్తే చాలు.. కొంతమేరకు ప్రయోజనం ఉంటుంది. 

కొబ్బరిపాలు, కొబ్బరి నూనె, ఆమ్లా ఆయిల్, నిమ్మరసం తదితరాలను కొద్ది కొద్దిగా తీసుకుని అన్నింటినీ బాగా కలిపి కుదుళ్లకు తగిలేలా జుట్టుకు పట్టించాలి. కొంత సేపటి తరువాత తలస్నానం చేయాలి. ఇది చుండ్రు సమస్యను తగ్గించడంతోపాటు జుట్టుకు సంరక్షణనిస్తుంది. కొద్దిగా దాల్చిన చెక్క పొడికి ఆలివ్ నూనె, తేనెలను కలిపి పేస్ట్‌లా తయారు చేసి జుట్టుకు పట్టించినా మంచి ఫలితం కనిపిస్తుంది. 

కలబంద, గోధుమ గడ్డి జ్యూస్‌లను తరచూ సేవించినా హెయిర్ ఫాల్‌ను అడ్డుకోవచ్చు. అలోవెరా జెల్‌ను జుట్టు కుదుళ్లకు పట్టించి తలస్నానం చేసినా వెంట్రుకలకు ఆరోగ్యం కలుగుతుంది. వారంలో ఇలా కనీసం రెండు సార్లు చేస్తే చక్కని ఫలితం ఉంటుంది. 

కొద్దిగా వేపాకులను తీసుకుని ముద్దగా నూరి జుట్టుకు బాగా పట్టించాలి. దీని వల్ల వెంట్రుకలు రాలడం తగ్గుతుంది. అంతేకాదు కుదుళ్ల గట్టిపడి వెంట్రుకలు ఒత్తుగా పెరుగుతాయి. అయితే ఈ వేపాకుల మిశ్రమానికి యాపిల్ సైడర్ వెనిగర్‌ను కలిపి వాడితే మరింత ఫలితం కనిపిస్తుంది. 

ధనియాల పొడితో చేసిన జ్యూస్ లేదా పెరుగు, శనగపిండిల మిశ్రమాన్ని తలస్నానం చేసేందుకు ఒక గంట ముందు జుట్టుకు బాగా పట్టించి అనంతరం స్నానం చేయాలి. దీంతో కూడా వెంట్రుకలు రాలడాన్ని తగ్గించుకోవచ్చు.