ఆన్‌లైన్ షాపింగ్‌కు వ్యతిరేకంగా 14న మెడికల్‌షాపుల బంద్

ఆన్‌లైన్‌లో ఔషధాల విక్రయాన్ని ఖండిస్తూ ఈనెల 14వ తేదీన దేశ వ్యాప్త బంద్‌కు ఆల్ ఇండియా ఆర్గనైజేషన్ ఆఫ్ కెమిస్ట్ అండ్ డ్రగిస్ట్ (ఏఐవోసీడీ) ప్రకటించింది. ఫలితంగా ఆ రోజున దేశ వ్యాప్తంగా మెడికల్ షాపులు మూతపడనున్నాయి. 

సాధారణ ప్రజానీకం ఆరోగ్యంతోపాటు సభ్యుల ప్రయోజనాలను పరిరక్షించేందుకే ఈతరహా కఠిన నిర్ణయాన్ని తీసుకున్నట్టు ఆ సంఘం ప్రకటించింది. ప్రస్తుతం ఈ సంఘానికి దేశంలో 7 లక్షల మంది సభ్యులున్నారు. 

ఇదే అంశంపై ఏఐవోసీడీ అధ్యక్షుడు జేఎస్ షిండే మాట్లాడుతూ.. ఆన్‌లైన్‌లో ఔషధ విక్రయాలను కేంద్రం తక్షణం నిషేధించాలని డిమాండ్ చేశారు. డ్రగ్స్ అండ్ కాస్మెటిక్స్ చట్టం, 1940 ప్రకారం.. ఇంటర్నెట్ ద్వారా మందులు విక్రయించడం చట్టవ్యతిరేకమన్నారు. 

ఈ-ఫార్మసీ వ్యాపారంపై తామిచ్చిన ఫిర్యాదుపై ప్రభుత్వం ఎలాంటి చర్యలు తీసుకోవట్లేదని షిండే అన్నారు. దీంతో దేశంలోని 8 లక్షల మంది కెమిస్ట్‌లు, 80 లక్షల మంది కార్మికులు వారి కుటుంబ సభ్యుల ప్రయోజనాలపై ప్రభావం పడుతున్నదని ఆయన అన్నారు.