మద్యం పుచ్చుకోవడం ఇటీవల సాధారణమైన విషయంగా మారిపోయింది. ఇదివరకు ఎక్కడో మారుమూల ప్రాంతాల్లో మద్యం దుకాణాలుండేవి. ఇప్పుడు మెయిన్ రోడ్డు ప్రక్కనే దర్జాగా కుర్చీల్లో కూర్చుని మద్యం బాటిళ్లను ఎదురుగా పెట్టుకుని తాగేస్తున్నారు. వీటితో పాటు సైడ్ డిష్‌గా మసాలాతో దట్టించిన పదార్థాలను కొందరు తింటే మరికొందరు వారికి ఇష్టమైనవవి తీసుకుంటూ వుంటారు. ఐతే కొన్ని పదార్థాలను మద్యంతో పాటు సేవిస్తే గుండెపోటు రావడం ఖాయం అంటున్నాయి పలు అధ్యయనాలు.
మద్యం సేవిస్తూ వేయించిన వేరుశెనగ పప్పు, లేదంటే పొడి జీడిపప్పు తినడం చాలామంది చేస్తుంటారు. కానీ వీటిని మద్యంతో పాటు తినరాదంటున్నారు. ఎందుకంటే వేరుశెనగ, జీడిపప్పులో కొలెస్ట్రాల్ అధికం. ఈ కొలెస్ట్రాల్ ఆరోగ్యానికి చాలా హానికరం. కొలెస్ట్రాల్ పెరగితే గుండెపోటు ప్రమాదం కూడా పెరుగుతుంది. కనుక వాటిని తీసుకోకపోవడం మంచిదంటున్నారు.
మరికొందరు సోడా లేదా కోల్డ్ డ్రింక్‌తో పాటు మద్యం సేవిస్తుంటారు. ఇది ఆరోగ్యాన్ని దెబ్బతీస్తుంది. ఎలాగంటే ఆల్కహాల్‌లో సోడా లేదా శీతల పానీయం కలిపి తాగడం వల్ల శరీరంలోని నీటి శాతం తగ్గిపోతుంది. ఫలితంగా శరీరం పట్టుతప్పి అనారోగ్య సమస్యలు తలెత్తుతాయి.
మద్యంతో పాటు జున్ను ముక్కలు తింటారు కొందరు. పాల ఉత్పత్తులతో తయారైన వస్తువులను మద్యం సేవించే సమయంలోనే కాదు ఆ తర్వాత ఒక గంట సమయం వరకు తినరాదు. పాలతో చేసిన వస్తువులను తినడం వల్ల జీర్ణక్రియను దెబ్బతీసి గుండెపోటు ప్రమాదాన్ని పెంచుతుంది. అలాగే మద్యం సేవిస్తున్న సమయంలోగానీ లేక ఆ తర్వాత ఒక గంటసేపు వరకు తియ్యని పదార్థాలు తినకూడదు. మద్యంతో తీపి తింటే మత్తును రెట్టింపు చేస్తుంది. దీనితో, వ్యక్తి తన నియంత్రణ కోల్పోయే అవకాశాలు అధికంగా ఉన్నాయని చెపుతున్నారు. కనుక మందుబాబులు తస్మాత్ జాగ్రత్త.