మన జీవితాల్లో కొన్ని సంధికాలాలుంటాయి..! చదువయ్యాక డిగ్రీ నుంచి ఉద్యోగాలకు వెళ్లడం అలాంటిదే. ఈ దశల్లో మనం కచ్చితమైన నిద్రవేళలు పాటించాల్సి ఉంటుంది. కానీ కొన్నిసార్లు కొంత నిద్రనీ త్యాగం చేయాల్సి ఉంటుంది. అలాంటప్పుడు మానసికంగా, శారీరకంగా చికాకులూ తప్పవు. వాటిని అధిగమించడానికి ఇలా చేసి చూడండి.
నిద్రించే వేళలను కచ్చితంగా పాటించాలి: పుట్టినప్పటి నుంచి స్కూలుకు వెళ్లే వరకు రోజుకు 18 గంటల నిద్రోపోయే మనిషి ఆ తరువాత ఆటలు, చదువు అంటూ నిద్రించే సమయం తగ్గించుకుంటాడు. ఏదెలా ఉన్నా... డిగ్రీకి వచ్చేప్పటికి సెలవులన్నీ కలుపుకుని సగటున ఎనిమిది గంటలు నిద్రపోతారని ఓ అంచనా.
ఉద్యోగంలోకి వచ్చాక ఆ సమయం మరో గంట తగ్గించుకుని తీరాల్సి ఉంటుంది. అయితే కొత్త అలవాటు కారణంగా అది కుదరని పరిస్థితిగా మారుతుంది. అటువంటి సమయంలో ముఖ్యంగా కచ్చితమైన నిద్ర వేళలు పాటించండి. 21 రోజులు వరుసగా ఆ సమయాలనే పాటిస్తే... అదే మీ జీవితంలో భాగమైపోతుంది.
సూర్య రశ్మి పడడం మంచిది:
కొత్త నిద్రవేళలు పాటించేప్పుడు ఉదయం పూట ఎండలో నిల్చోవడం ఓ అలవాటుగా మార్చుకోండి. తద్వారా నిద్ర తక్కువైందనే చికాకుపోయి కొత్త ఉత్సాహం ఏర్పడుతుంది. అంతేకాదు.. ఈ ఉదయం పూట ఎండలో నిలబడడం ద్వారా రాత్రి మనం మరింత గాఢంగా నిద్రపోవడానికి ఉపయోగపడుతుంది.
వ్యాయామం ఉత్తమం:
కొత్త నిద్రవేళలు మీ శరీరానికీ మనసుకీ పూర్తిగా అలవాటయ్యేదాకా.. దాని ప్రభావం ఏకాగ్రతా విశ్లేషణ సామర్థ్యంపై పడుతూనే ఉంటుంది. దాన్ని కొంత వరకూ నివారించాలంటే ఉదయం లేవగానే కాసేపు వ్యాయామం చేయడంకానీ, నడవడం కానీ చేయాలి. ఆఫీసులోనూ మధ్యాహ్నం వేళ ఓ పది నిమిషాలు నడవడం ఆరోగ్యానికి ఎంతో మేలు చేకూరుస్తుంది. ఇలా చేయకపోతే కార్యాలయాల్లో కునుకుపాట్లు తప్పవు.