చలికాలంలో చర్మం రక్షణకు ఎన్ని జాగ్రత్తలు తీసుకుంటారో.. అదే విధంగా కేశ రక్షణ అంతే జాగ్రత్తలు తీసుకోవాలి. ఎందుకంటే.. ఈ కాలంలో అనారోగ్య సమస్యల కారణంగా జుట్టు ఎక్కువగా రాలిపోతుంది. దాంతో పాటు పొడిబారుతుంటుంది. అందుకు రకరకాల షాంపూలు, నూనెను వాడుతుంటారు. వీటిని వాడడం వలన ఎలాంటి ఫలితాలు ఉండవని చెప్తున్నారు. కాబట్టి ఇంట్లో సహజసిద్ధమైన పదార్థాలతో కేశ రక్షణ ఎలా చేయాలో చూద్దాం...
చాలామంది తలస్నానం చేసిన తరువాత కేశాలను వివిధ రకాలుగా కొప్పు వేస్తుంటారు. ఇలా చేసినప్పుడు జుట్టు బిగుతుగా ఉంటుంది. దాంతో జుట్టు రాలే సమస్య అధికంగా ఉంటుంది. జుట్టు చిట్లే అవకాశాలున్నాయి. కనుక కొప్పుకు బదులుగా జడ వేసుకుంటే మంచిది. అంతేకాకుండా తలనొప్పి వచ్చే అవకాశాలు కూడా ఉన్నాయి. కనుక కొప్పులను వేయడం మానేయండి.
ఈ చలికాలంలో రోజూ తలస్నానం చేయడం వలన వెంట్రుకలకు పోషణనిచ్చే సహజ నూనెలు తొలగిపోయి జుట్టు బలహీనంగా, జీవం కోల్పోయినట్టుగా కనిపిస్తుంది. కనుక వారంలో రెండుసార్లు జుట్టును శుభ్రం చేయడం మంచిది. షాంపూతో తలస్నానం చేసిన తరువాత జుట్టుకు కండిషినింగ్ తప్పనిసరిగా చేయాలి. కండిషినింగ్ చేస్తే వెంట్రుకలు అంతగా పొడిబారవు.
వారంలో ఓసారి గోరువెచ్చటి కొబ్బరి నూనెతో లేదా బాదం నూనెతో తలకు మర్దన చేసుకోవాలి. దీంతో తల భాగంలో రక్తప్రసరణ బాగా జరుగుతుంది. జుట్టుకు కావలసిన పోషకాలు కూడా అందుతాయి. దాంతో జుట్టు పొడిబారడం తగ్గి చుండ్రు సమస్య పోతుంది. తడి జుట్టును ట్రిమ్ చేస్తే జుట్టు దృఢత్వాన్ని కోల్పోతుంది. అందువలన ట్రిమ్మింగ్ చేయకండి..