ఆర్థిక ఇబ్బందుల కారణంగా నూతన దర్శకనిర్మాత బండారు జగదీష్ ఆత్మహత్య చేసుకున్నాడు. జగదీష్ ఇటీవల 'బూచోడు' అనే సినిమాను స్వీయదర్శకత్వంలో నిర్మిస్తున్నాడు. షూటింగ్‌లో భాగంగా అతను యూనిట్ సభ్యులతో కలిసి విశాఖపట్నం వచ్చారు. అక్కడ ఓ హోటల్‌లో చిత్రయూనిట్‌తో కలిసి బస చేశారు.
ఈ నేపధ్యంలో ఆయన ఆదివారం విశాఖపట్నంలోని సింహపురి కాలనీ నుంచి చాకిరేవుకొండకు వెళ్లే కొండ ప్రాంతంలో ఒక హెచ్‌టీ లైన్ విద్యుత్ టవర్‌కు ఉరి వేసుకుని ఆత్మహత్య చేసుకున్నారు. తాను ఈ ప్రాంతంలో ఉంటానని సినిమా యూనిట్ సభ్యుల్లో ఒకరికి సెల్‌ఫోన్‌లో మెసేజ్ పెట్టాడు.
ఈ విషయం తెలుసుకున్న జగదీష్ అన్నయ్య ఈ ప్రాంతంలో వెతకగా సాయంత్రానికి గుర్తించారు. మృతదేహాన్ని పోస్టుమార్టం నిమిత్తం కేజీహెచ్‌కు తరలించారు. మృతుడు జగదీష్ ఆర్థిక సమస్యలతో ఆత్మహత్యకు పాల్పడి ఉండవచ్చని పోలీసులు భావిస్తున్నారు.