బెంగుళూరులో పార్టీకి వెళ్లి వస్తున్న యువతిపై బైకర్ అఘాయిత్యం

దేశంలో మహిళలు, యువతులపై జరుగుతున్న అఘాయిత్యాల సంఖ్య నానాటికీ పెరిగిపోతున్నాయి. తాజాగా పార్టీకి వెళ్లి వస్తున్న యువతిపై బైకర్ అఘాయిత్యానికి పాల్పడ్డారు. ఈ సంఘటన బెంగుళూరు ఈస్ట్ జోన్ పరిధిలో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే, 

బెంగుళూరు నగరంలోని ఓ కాలేజీలో డిగ్రీ చివరి సంవత్సరం చదువుతున్న ఓ విద్యార్థిని కోరమంగళ ప్రాంతంలో గెట్ టుగెదర్ పార్టీకి హాజరైంది. ఆ పార్టీ ముగిసిన తర్వాత వేకువజామున తిరిగి వచ్చే క్రమంలో, ఓ వ్యక్తిని లిఫ్ట్ అడిగింది. బైకుపై ఆ అమ్మాయిని ఎక్కించుకున్న ఆ వ్యక్తి... ఆమెపై లైంగిక దాడికి పాల్పడ్డాడు. బాధితురాలి ఫిర్యాదు మేరకు పోలీసులు కేసు నమోదు చేసుకుని దర్యాప్తు ప్రారంభించారు. 

ఈ కేసులో నిందితుడు ఒక్కడే అని, బైకుపై లిఫ్ట్ ఇచ్చిన వ్యక్తే అత్యాచారానికి పాల్పడ్డాడని పోలీసులు తెలిపారు. దీనిపై బెంగళూరు ఈస్ట్ జోన్ ఏసీపీ రమణ్ గుప్తా మాట్లాడుతూ, పోలీసులు ఘటన స్థలాన్ని పరిశీలించారని, బాధితురాలితోనూ, ఆమె కుటుంబ సభ్యులతోనూ మాట్లాడారని వెల్లడించారు.

అత్యాచార ఘటనకు సంబంధించి పూర్తి సమాచారం సేకరించామని, పోలీసులు ఐదు బృందాలుగా ఏర్పడి నిందితుడి కోసం గాలింపు చేపట్టినట్టు వివరించారు. త్వరలోనే రేపిస్టును అరెస్టు చేస్తామని తెలిపారు. ఒకవైపు, కోల్‌కతాలో మహిళా మెడికోపై జరిగిన హత్యాచారం ఘటనతో దేశంలో నిరసనలు తీవ్ర స్థాయిలో జరుగుతున్నాయి.