మ్యాచ్ చూడటానికి వచ్చిన పాము

శ్రీలంకలో లంక ప్రీమియర్ లీగ్ (ఎల్పీఎల్) మ్యాచ్‌లు నిర్వహిస్తున్నారు. ఈ మ్యాచ్‌ను చూసేందుకు పాము అతిథిగా వచ్చింది. దంబుల్లా ఔరా, గాలె టైటాన్స్ జట్ల మధ్య మ్యాచ్ జరుగుతుండగా, ఆరడుగుల పొడవున్న జెర్రిపోతు పాము మైదానంలో ఎంట్రీ ఇచ్చింది. 

అంతే క్రికెటర్లతో పాటు ఫ్యాన్స్ కూడా జడుసుకున్నారు. గాలె స్పిన్నర్ షకీబల్ హసన్ బౌలింగ్ చేస్తున్న సమయంలో ఈ ఘటన జరిగింది. మైదానంలో ఒక్కసారిగా పాము కలకలం చెలరేగింది. 

ఇంకా మ్యాచ్‌కు అంతరాయం కలిగింది. మైదానం సిబ్బంది వెంటనే అప్రమత్తమై ఆ పామును మైదానం నుంచి బయటికి పంపించారు. దీనికి సంబంధించిన వీడియో ప్రస్తుతం నెట్టింట వైరల్ అవుతోంది.