టీ20 ప్రపంచకప్‌లో సంచలన రికార్డ్.. ఆరు వికెట్లు, పది పరుగులకే ఆలౌట్

బాంగీలో జరిగిన టీ20 ప్రపంచకప్ ఆసియా క్వాలిఫైయర్-ఏలో సంచలన రికార్డ్ నమోదైంది. ఈ మ్యాచ్‌లో మంగోలియా జ‌ట్టు 10 పరుగులకే ఆలౌట్ అయింది. సింగ‌పూర్‌తో జ‌రిగిన మ్యాచ్‌లో ఆ జ‌ట్టు త‌క్కువ స్కోర్‌కే ప‌రిమిత‌మైంది. 

దీంతో పురుషుల టీ20లో అత్యల్ప స్కోరును సమం చేసింది. గతేడాది స్పెయిన్‌పై ఐల్ ఆఫ్ మ్యాన్ కూడా ఇలాగే ప‌ది ప‌రుగుల‌కే కుప్ప‌కూలింది. దాంతో ఇప్పుడు ఆ అత్య‌ల్ప స్కోర్‌ రికార్డు స‌మం అయింది.

ఇక మంగోలియా ఇన్నింగ్స్‌లో ఐదుగురు బ్యాటర్లు డకౌట్‌గా వెనుదిరిగారు. సింగపూర్ బౌల‌ర్ల‌లో హర్ష భరద్వాజ్ 6 వికెట్ల‌తో విజృంభించాడు. నాలుగు ఓవర్లు వేసిన అత‌డు కేవ‌లం మూడు ప‌రుగుల‌కే 6 వికెట్లు ప‌డ‌గొట్టాడు. 

17 ఏళ్ల లెగ్‌స్పిన్నర్ త‌న మొద‌టి ఓవ‌ర్‌లోనే రెండు వికెట్లు ప‌డగొట్టడం విశేషం. అలాగే పవర్‌ప్లేలో మంగోలియా కోల్పోయిన ఆరు వికెట్లలో ఐదు వికెట్లు భ‌ర‌ద్వాజే తీశాడు. అనంతరం సింగపూర్ 11 పరుగుల లక్ష్యాన్ని కేవలం ఐదు బంతుల్లోనే ఛేదించింది.