''మా ఆయన మంచి వంటగాడు.. పాస్తా అద్భుతంగా చేసేస్తారు''..అని కుమార సంగక్కర శ్రీమతి యెహాలి వెల్లడించారు. 15 సంవత్సరాలుగా దేశం కోసమే ఆడారని.. ఆయన రిటైర్మెంట్ జీర్ణించుకోలేకపోతున్నానని చెప్పారు. క్రికెట్ నుంచి తప్పుకోవడం బాధాకరమంటూనే, కుటుంబం కోసం సమయం కేటాయించాల్సిన సమయం వచ్చిందని సంగా భార్య తెలిపారు. మ్యాచ్‌‌లు లేకుంటే ప్రతి క్షణం కుటుంబం కోసమే తపిస్తాడు. ఒంటరిగా ఉంటే మాత్రం పుస్తకాలు చదువుతూ కాలక్షేపం చేస్తాడు. మంచి భర్త, మంచి తండ్రి... మొత్తమ్మీద ఫ్యామిలీ మ్యాన్ అని యెహాలీ చెప్పుకొచ్చారు.
ఓ ఇంటర్వ్యూలో యెహాలీ మాట్లాడుతూ... "15 ఏళ్లుగా దేశం కోసమే ఆడాడు. అతని అద్భుతమైన కెరీర్ పట్ల ఎంతో సంతోషంగా ఫీలవుతున్నాను. ఇది సరైన సమయంలో ముగింపుగా భావిస్తున్నాను. వ్యక్తిత్వం విషయానికొస్తే సంగా ఎంతో మానసిక పరిపక్వత ఉన్నవాడు. క్రికెట్ గురించే కాదు, ఇతర అంశాలను సైతం ప్రతి కోణం నుంచి ఆలోచిస్తాడు. ఎంతటి సమస్యనైనా ఈజీగా తీసుకుంటాడు.
కష్టకాలంలోనూ నిబ్బరం కోల్పోవడం నేనెరుగను. వైవాహిక జీవితం అన్న తర్వాత భేదాభిప్రాయాలు తప్పవు. మేమూ అంతే. సంగా మనసులో ఏదీ పెట్టుకోడు. ఏదైనా గొడవపడితే నాదే పైచేయి (నవ్వుతూ). సంగా తానే కాస్త వెనక్కి తగ్గుతాడు. లోపల ఒకలా, బయట మరోలా వ్యవహరించడం సంగాకు తెలియదని సంగా శ్రీమతి చెప్పుకొచ్చారు.