బంగ్లాదేశ్ క్రికెటర్ షాదత్ హుస్సేన్ మరిన్ని చిక్కుల్లో పడేలా కనిపిస్తున్నారు. ఈయన ఇంట్లో పని చేసిన ఓ బాలిక ఈ క్రికెటర్‌పై పలు రకాల ఆరోపణలు చేస్తోంది. ముఖ్యంగా.. తనను నిత్యం వేధించారంటూ ఫిర్యాదు చేసింది. దీంతో పోలీసులు కేసు నమోదు చేసి దర్యాప్తు జరుపుతున్నారు. ఈ బాలిక పేరు మహఫుజా అక్తర్ . వయస్సు పదకొండు సంవత్సరాలు. అక్తర్ సంరక్షణ బాధ్యతలను ఆమె అమ్మమ్మ చూసుకుంటుంది.
ఈ బాలికను హుస్సేన్ ఇంట్లో ఆమె అమ్మమ్మ పనికి పెట్టింది. అయితే, షాదత్ కుటుంబ సభ్యులు కర్రలతో, వంట సామగ్రితో నిత్యం తనను చావగొట్టేవారని ఆ బాలిక పేర్కొంది. ఈ బాధ భరించలేక ఒక రోజున ఆ ఇంట్లో నుంచి పారిపోయానని చెప్పింది. అక్తర్ ముఖంపై గాయాల ఆనవాళ్లే కాకుండా, ఒక కన్ను పూర్తిగా వాచిపోయి ఉంది. ఆ బాలికను గమనించిన ఒక జర్నలిస్టు ఆసుపత్రికి తీసుకువెళ్లి చికిత్స చేయించాడు. ఈ విషయం బాలల హక్కుల సంఘాలకు తెలియడంతో వారు రంగంలోకి దిగారు. ప్రస్తుతం ఈ బాలిక స్వచ్ఛంద సంస్థ సంరక్షణలో ఉంది.