కాస్మొటిక్స్‌ని ఎప్పటికప్పుడు నిర్ణీత సమయం అయిపోగానే మారుస్తుండాలి. లేకపోతే వాటివల్ల చర్మ వ్యాధులు వచ్చే అవకాశం ఉంటుంది. అందుకే దేన్ని ఎన్ని రోజులకొకసారి మార్చాలో తెలుసుకుందాం.
లిక్విడ్‌ ఐలైనర్ల కన్నా పెన్సిల్లే ఎక్కువ రోజులు పనిచేస్తాయి. కానీ ఈ రెండింటినీ కూడా మూడు నెలలకోసారి మారుస్తుండాలి. సాధారణంగా అవి కొన్నిరోజుల తర్వాత సువాసన పోయి జిగటగా అంటుకుంటుంటాయి. అలా అయితే అవి పాడైపోయానని అర్థం.
లిప్ స్టిక్‌లో వాసన, సాంద్రతల్లో తేడా రాగానే మార్చేయాలి. అలాగే లిప్‌స్టిక్‌ సరిగా అంటకపోయినా, రంగు మారినా దాన్ని వాడకుండా ఉండడం మంచిది.
లిక్విడ్‌ బేస్డ్‌ ఫౌండేషన్‌ని ఒక్కసారి సీల్‌ తీసిన ఆరునెలల తర్వాత మార్చేయాలి. ఒకవేళ అంతలోపే దాని రంగులోగానీ, వాసనలోగానీ ఏదైనా తేడా అనిపిస్తే వెంటనే దానిలో స్థానంలో కొత్తది తెచ్చుకోవాలి.
మస్కారాని మూడు నెలలకొకసారి తప్పనిసరిగా మార్చాలి. అలాగే ఎప్పటికప్పుడు వాసనని గమనిస్తూ ఉండాలి. లేకపోతే కళ్ళకు హాని కలిగే అవకాశం ఉంది.
సాధారణంగా ఫేస్‌ పౌడర్‌, పౌడర్‌ బ్లష్‌లను రెండు సంవత్సరాలకోసారి మారుస్తుండాలి. ఒకవేళ అప్పటికే బ్యాక్టీరియా ఏర్పడినట్టనిపిస్తే వాటిని వాడడం మానేయాలి. ఐషాడో వంటి వాటిల్లోకి సులభంగా తేమ చేరుతుంటుంది. వీటి రంగు, వాసన మారినట్లనిపిస్తే వెంటనే దాన్ని చెత్తలో వేయడం మంచిది. వీటన్నిటితోపాటు మీకు అలర్జీ వంటివి కలుగజేసే కాస్మొటిక్స్‌ ఏవైనా ఉంటే.. వాటిని నిరుపయోగంగా ఉంచకండి. పడేయండి.