ఆంథొనీ ఫాచీ: ఒకప్పుడు ఎయిడ్స్‌‌తో, ఇప్పుడు కరోనాతో యుద్ధానికి దిగిన సైనికుడు

కరోనావైరస్‌తో అమెరికా చేస్తున్న పోరాటానికి డాక్టర్ ఆంథొనీ ఫాచీ ముఖచిత్రంగా మారారు. కానీ ప్రమాదకరంగా వ్యాపిస్తున్న తప్పుడు సమాచారంతో, కొన్నిసార్లు తమ సొంత ప్రభుత్వంలోని వారితోనే ఈయన యుద్ధం చేయాల్సివస్తోంది.

వైద్య పరిశోధకుడుగా ఐదు దశాబ్దాల అనుభవం ఉన్న ఫాచీ.. దేశంలో తన దిష్టిబొమ్మలు దహనం చేస్తుంటే, ఆందోళనకారులు తనను ‘హంతకుడు’గా వర్ణిస్తుంటే, తన ఆఫీసుపై పొగబాంబులు విసురుతుంటే అన్నీ చూస్తూ తనపని తాను చేసుకుపోతున్నారు.

కానీ, అమెరికా అత్యంత తీవ్రమైన ప్రజారోగ్య సంక్షోభాన్ని ఎదుర్కొని, అసాధ్యమైన ప్రగతిని సాధించడానికి ఆ కనికరం, ప్రశాంతతలే ఆయనకు సహకరించాయని, ఆయన దేశంలోనే అత్యంత ప్రముఖ ప్రముఖ వైద్యుడని చాలామంది ఫాచీని ప్రశంసిస్తున్నారు. ఇంతకు ముందు 1980లలో అమెరికాలో హెచ్ఐవీ/ఎయిడ్స్ మహమ్మారి వ్యాపించిన సమయంలో నేషనల్ ఇన్‌స్టిట్యూట్ ఆఫ్ హెల్త్ ఇమ్యునాలజీ హెడ్‌గా ఉన్న డాక్టర్ పాచీ ఇప్పుడు 79 ఏళ్ల వయసులోనూ ఇలాంటి గడ్డు పరిస్థితినే ఎదుర్కున్నారు.

ఇప్పుడు, కోవిడ్-19తో పోరాటానికి అమెరికా ‘యుద్ధ స్థితి’లో ఉందని అమెరికా అధ్యక్షుడు ట్రంప్ ప్రకటించినపుడు, ఆ యుద్ధంలో ఫాచీ మళ్లీ కీలకంగా నిలిచారు.

తండ్రి కూడా వైద్యుడే

1940లో క్రిస్మస్ ముందు రోజు(డిసెంబర్ 24) ఇటలీ నుంచి వలస వచ్చి బ్రూక్లిన్‌లో నివసిస్తున్న ఒక డాక్టర్ కుటుంబంలో పుట్టారు ఫాచీ. “నేను సైకిల్ తొక్కే వయసు నుంచే మందులు డెలివరీ చేసేవాడిని” అని ఆంథొనీ 2002లో హోలీ క్రాస్ అలుమ్నీ మాగజైన్‌కు చెప్పారు.

1966లో కార్నెల్ మెడికల్ స్కూల్ నుంచి ఫస్ట్ క్లాస్ గ్రాడ్యుయేట్ అయిన ఫాచీ, అక్కడ చదువుకుంటున్న సమయంలో వేసవి సెలవుల్లో తమ కాలేజీలోనే లైబ్రరీ నిర్మాణ పనులకు వెళ్లి ఖర్చులకు డబ్బులు సంపాదించారు. ఒక హాస్పిటల్‌లో పనిచేసిన తర్వాత 1968లో అమెరికా యుద్ధ ప్రయత్నాల్లో భాగంగా ఆయన ఎన్ఐహెచ్‌లో చేరారు.

దశాబ్దాల తర్వాత 1981 జూన్ 5న ఒక రిపోర్ట్ తన టేబుల్ దగ్గరికి వచ్చినపుడు, ఫాచీ కెరీర్ కీలక మలుపు తిరిగింది. అందులో, ఆరోగ్యంగా ఉన్న వారు సాధారణంగా క్యాన్సర్ రోగుల్లో కనిపించే వింత లక్షణాలతో చనిపోవడం ఆయన గమనించారు. దాని తర్వాత వెంటనే వచ్చిన మరో రిపోర్ట్ ఆ వ్యాధికి గురైన 26 మంది చనిపోయారని చెప్పింది వారందరూ స్వలింగ సంపర్కులు, పురుషులు.

“దాన్ని చాలా స్పష్టంగా చదవడం నాకు గుర్తుంది. నా మెడికల్ కెరీర్‌లోనే మొట్టమొదటిసారి నాకు రోమాలు నిక్కబొడుచుకున్నాయి. చూద్దాంలే అని నేను దాన్ని కొట్టిపారేయలేదు. అక్కడ ఏదో జరగరానిది ఏదో జరుగుతోంది. అది నిజానికి లైంగికంగా సంక్రమించిన వ్యాధిలా పనిచేసే ఒక కొత్త సూక్ష్మజీవి లాంటిది” అని ఫాచీ చెప్పారు.

మెడిసన్ మాన్, మర్డరర్

ఒక వైద్యుడుగా మనిషి రోగనిరోధకశక్తి నియంత్రణ కోసం పనిచేసిన డాక్టర్ ఫాచీకి, ఆ అనుభవం కొత్త హెచ్ఐవీ వైరస్ శరీరంలోని రక్షణ వ్యవస్థను ఎలా నాశనం చేస్తుందో బయటపెట్టేందుకు ఉపయోగపడింది. ఎయిడ్స్ చికిత్స కోసం ఉపయోగించిన మొదటి యాంటీ రిట్రోవైరల్ డ్రగ్ ‘జిడోవుడైన్’ కోసం జరిగిన వైద్య పరీక్షలకు ఆయన నేతృత్వం వహించారు.

1980ల్లో ఈ మహమ్మారి అమెరికా అంతా వ్యాపిస్తుంటే, రీగన్ ప్రభుత్వం నుంచి ఎలాంటి స్పందన లేకపోవడం, కొత్త మందులు ఏవీ లభించకపోవడంతో ఆగ్రహించిన నిరసనకారులకు ఫాచీ లక్ష్యంగా మారారు. ప్రభుత్వ కార్యాలయాల బయట ఆందోళనలకు దిగిన నిరసనకారులు “డాక్టర్ ఫాచీ... మీరు మమ్మల్ని చంపేస్తున్నారు” అని అరిచేవారు. టీవీ చర్చల్లో పాల్గొనేవారు ఆయన్ను నిందించేవారు.

నాటక రచయిత, స్వలింగ సంపర్కుల హక్కుల న్యాయవాది లారీ క్రామెర్ ఆయన పేరుతో ఒక నాటకంలో విలన్ పాత్రను కూడా సృష్టించారు. “కిటికీలోంచి చూస్తుంటే, ఎన్ఐహెచ్ బయట ఉన్న జనం పొగబాంబులు విసరడం నాకు ఇంకా గుర్తుంది. పోలీసులు వారిని అరెస్టు చేయడానికి సిద్ధంగా ఉన్నారు. కానీ, నేను వద్దు వాళ్లతో మాట్లాడాలి. పైన నా ఆఫీసులోకి తీసుకురండి అని చెప్పాను” అని 2011లో ఇచ్చిన ఒక ఇంటర్వ్యూలో ఫాచీ చెప్పారు.

ఎయిడ్స్ బాధితుల పట్ల ఆయన దయాగుణం ప్రశంసనీయం. కొత్త ఔషధాలతో రోగులపై క్లినికల్ ట్రయల్స్ నిర్వహించడంపై ఉన్న ఆంక్షలను సడలించేలా అధికారులను ఒప్పించిన ఘనత కూడా ఆయనదే దక్కింది. న్యూయార్క్ టైమ్స్ ఆయన్ను “ప్రభుత్వంలో ప్రముఖ ఎయిడ్స్ సెలబ్రిటీ”గా పేర్కొంది. కానీ ఫాచీ నిజానికి తన పరిశోధనలన్నింటినీ స్వయంగా తనే చేశారనేది మనం గమనించాలి. ఆయన 2008లో అమెరికా అత్యున్నత పౌర పురస్కారం ‘ది ప్రెసిడెంట్ మెడల్’ కూడా అందుకున్నారు. 1984లో ఆయన్ను ఎన్ఐహెచ్‌లో అలర్జీ అండ్ ఇన్ఫెక్షియస్ డిసీజెస్ డివిజన్ డైరెక్టర్‌గా నియమించారు.

మరో మహమ్మారి కరోనా

ఫాచీ నేతృత్వం వహించిన పరిశోధనా విభాగం ఎయిడ్స్ నుంచి ఎబోలా, ఆస్తమా వరకూ అన్నిరకాలవాటిపై అధ్యయనాలు చేసింది. ఆయన ఆరుగురు అధ్యక్షులకు సలహాలు ఇచ్చారు. ఆఫ్రికాలో ఎయిడ్స్ మూలాల గురించి కనుగొనేందుకు జార్జ్ డబ్ల్యు బుష్ ప్రభుత్వానికి సహకరించారు. ఇప్పుడు ట్రంప్ పాలనలో దేశమంతా కోవిడ్-19 వ్యాపిస్తున్న సమయంలో దాని తీవ్రత గురించి ప్రజలకు అర్థమయ్యేలా వివరించే పనిలో ఉన్నారు.

అమెరికన్లకు వైట్ హౌస్‌లో పోడియం వెనుక నిలబడి కోవిడ్-19 గురించి సమాచారం ఇచ్చే ఒక నమ్మకస్తుడిలా మారారు ఫాచీ. అక్కడ నుంచి ఆయన అమెరికా చర్యల గురించి ప్రజలకు వాస్తవాలు చెబుతారు. సైన్స్ గురించి వివరిస్తారు, కొన్నిసార్లు అధ్యక్షుడు ట్రంప్ ప్రకటనలను సరిదిద్దుతుంటారు.

“దీనికి త్వరలో వాక్సిన్ తయారు చేస్తామని” ఆశిస్తున్నట్లు ట్రంప్ చేసిన ప్రకటనను నీరుగారుస్తూ, “ఒక వాక్సిన్ తయారీకి కనీసం ఏడాదిన్నర పడుతుందని” ఆయన చెప్పారు. తనకు ఎవరైనా అడ్డుచెప్పడం అసలు నచ్చని ప్రస్తుత అమెరికా అధ్యక్షుడు కూడా డాక్టర్ ఫాచీని ప్రశంసలతో ముంచెత్తుతుంటారు. ట్రంప్ ఆయన్ను “ఒక పెద్ద టీవీ స్టార్‌”గా వర్ణించారు.

అయితే, అధ్యక్షుడి వాదనలకు విరుద్ధంగా ఫాచీ మాట్లాడడం చూసిన పరిశీలకులు “వైట్‌హౌస్‌తో కలిసి పనిచేయడంలో ఆయనలో ఉన్న సంఘర్షణను అది బయపెట్టింది” అని చెబుతున్నారు. చాలామంది షేర్ చేస్తున్న ఒక ఇంటర్వ్యూలో డాక్టర్ ఫాచీ ఒక సైన్స్ మ్యాగజీన్‌తో మాట్లాడుతూ “ప్రజలకు సరైన సమాచారం అందించే విషయానికి వస్తే, వీలైనంత వరకూ వాస్తవాలు చెప్పడానికే చూస్తా, అసాధ్యమైనవి నేను చేయలేను” అని ఆయన స్పష్టంగా చెప్పారు.

“నేను మైక్రోఫోన్ ముందున్న ఆయన్ను(అధ్యక్షుడు ట్రంప్) పక్కకు తోసి, ఓకే.. ఆయన చెప్పారుగా.. ప్రయత్నించి చూస్తా అనలేను. తర్వాత ఆ మాటను సరిదిద్దుకోలేను” అన్నారు. కానీ ఆయన తన దారిలో ముందుకు వెళ్లడానికే ప్రయత్నిస్తున్నారు. “నాకు తెలిసినంత వరకూ, నన్ను ఎవరూ తీసేయలేదు” అంటున్నారు.