పాలకూరను ఆహారంగా తీసుకునే వారికి ఒవేరియన్ క్యాన్సర్ వ్యాధులను నివారించవచ్చని ఇటీవలి పరిశోధనల్లో సైతం వెల్లడయ్యింది. శరీరానికి కావలసిన ఐరన్ పాలకూరలో అధికంగా ఉంది. ఈ ఐరన్ రక్తహీనతను తగ్గిస్తుంది. వ్యాధి నిరోధకశక్తిని పెంచుతుంది. జ్వరం, పిత్తం, వాయు శ్వాస సంబంధిత రోగాలకు పాలకూర దివ్యౌషధంగా పనిచేస్తుంది. పాలకూరకు రక్తాన్ని శుద్ధి చేసే తత్వం అధికంగా ఉంది.
పాలకూరలో లభించే విటమిన్ సి, ఎ, మెగ్నీషియం, ఫోలిక్ యాసిడ్స్ వంటి ఖనిజాలు క్యాన్సర్ వ్యాధులను నివారించడంలో తోడ్పడతాయి. ముఖ్యంగా ఊపిరితిత్తులు, బ్రెస్ట్ క్యాన్సర్‌ను అదుపు చేయటంలో పాలకూర ప్రముఖ పాత్ర పోషిస్తుంది. గుండె సంబంధిత వ్యాధుల నుండి కాపాడుతుంది. పోషకాహార నిధి అయిన పాలకూరలో లభించే ఫ్లేవనాయిడ్స్ వయసుతోపాటు వచ్చే మతిమరుపును దూరం చేస్తాయి. పాలకూరలో పదమూడు రకాల యాంటీ ఆక్సిడెంట్‌లు ఉన్నాయి. ఇవి యాంటీ క్యాన్సర్ ఏజెంట్లుగా పనిచేస్తాయి.
స్త్రీల సౌందర్యానికి పాలకూర ఎంతగానో తోడ్పడుతుంది. పాలకూరను వెజిటబుల్ సూప్‌లోనూ, చపాతీలు పిండిలో, పకోడీల పిండిలో, పన్నీర్‌తో కలిపి వండే కూరల్లోనూ పాలకూరను వాడుకోవచ్చు. ఇతర ఆకుకూరల్లా పాలకూరను కూరలా, వేపుడుగా చేసుకుని కూడా తినవచ్చు. ఎలాగైనా సరే ప్రతిరోజూ తినే ఆహార పదార్థాలలో పాలకూరను భాగం చేసుకుంటే ఆరోగ్యానికి చాలా మంచి చేస్తుందని పోషకాహార నిపుణులు సూచిస్తున్నారు.