వాలెంటైన్ డే వచ్చిందంటే ఒంటరి జీవులు జంటగా మారేందుకు ముహూర్తాలు నిర్ణయించుకుంటాయి. ప్రేమ బంధాన్ని మరింత పటిష్టం చేసుకునేందుకు వేదిక ఈ ప్రేమికుల రోజును ఉపయోగించుకుంటారు. ఆరోజు నాడు పరస్పరం కానుకలిచ్చుకుని శుభాకాంక్షలు చెప్పుకుంటారు.
ఇంతకీ రాహుల్ గాంధీకీ - వాలెంటైన్ డే‌తో పనేంటి అంటారా...? మరేం లేదండీ... తమ్ముడు వరుణ్ గాంధీ పెళ్లికి సిద్ధమైపోయాడు. అన్నయ్య రాహుల్ మాత్రం పెళ్లి పేరు చెబితే ముసిముసిగా నవ్వుతున్నాడు తప్పించి పెదవి విప్పడాయె. రాహుల్ వరస చూసిన కొంతమంది ఆయన ఇప్పటికే ఎవరి ప్రేమలోనే పడి ఉంటారని గట్టిగా వాదిస్తున్నారు.
దీనికి బలం చేకూర్చుతూ ఆ మధ్య స్పానిష్ గర్ల్‌ఫ్రెండ్ వెరోనిక్‌తో రాహుల్ కనబడ్డాడు. అంతే... రకరకాల వార్తలు షికారు చేశాయి. ఆమెను వివాహం చేసుకోబోతున్నాడంటూ చాలా పత్రికలు రాశాయి. కానీ యువరాజు మాత్రం ఏమీ మాట్లాడలేదు. ప్రేమా లేదూ దోమా లేదు అని కొట్టి పారేశాడు.
కానీ రాహుల్ గాంధీ పెళ్లెప్పుడు చేసుకుంటారంటూ దేశంలోని ప్రజలే అప్పుడప్పుడూ... అంటే సందర్భం వచ్చినప్పుడు... అదేనండీ వాలెంటైన్ డే వంటి ప్రేమికుల రోజు వచ్చినప్పుడు... రాహుల్ ఎవరినైనా ప్రేమించారేమో అనే సందేహాన్ని వ్యక్తం చేస్తున్నారు. మరి యువరాజు వచ్చే వాలెంటైన్ డే నాటికైనా జంటగా కనబడతాడో లేదో చూడాలి.