సరదాగా సాగిపోయే నారా రోహిత్ - నందితల "సావిత్రి" కథ

విభిన్న చిత్రాలకు కేరాఫ్ అడ్రస్‌గా మారిన హీరో నారా రోహిత్. గతంలో 'బాణం'తో ఎంట్రీ గంభీరంగా ఇచ్చి టాలీవుడ్‌లోకి అడుగుపెట్టాడు. ఈ కుర్ర హీరో నటించిన చిత్రం 'సావిత్రి'. శుక్రవారం విడుదలైంది. ఈ కథను పరిశీలిస్తే... పెళ్లిలోనే పుట్టిన సావిత్రి (నందిత)కు పెళ్లి అంటే చాలా యిష్టం. చిన్నప్పటి నుంచీ పెళ్లి, పెళ్లి అని కలవరిస్తూ 20 యేళ్లకు చేరుకుంటుంది. ఆమె పెళ్లి కోసం ఎంతకైనా తెగించే ఆమె తన అక్క గాయిత్రి (ధన్యా బాలకృష్ణన్)కి పెళ్లైతే తనకు లైన్ క్లియర్ అవుతుందని భావించి, ఆమెకు పెళ్ళి చేయిస్తుంది. 

ఇంత చేసినా ఆమె పెళ్లి కాదు.. అప్పటికి కూడా ఆమె జీవితంలో రాజకుమారుడు ఎంట్రీ ఇవ్వడు. తను ఎంత గాఢంగా పెళ్లి అనుకున్నా దూరం అవుతోందే అనుకుంటున్న సమయంలో ఆమె తన కుటుంబ సభ్యులతో విహార యాత్రకు షిర్డీ వెళుతుంది. మార్గమధ్యంలో రిషి (నారా రోహిత్) ఎంటరై.. సావిత్రిని ఆటపట్టిస్తాడు. అక్కడ నుంచి వీరిద్దరి మధ్య రొటీన్ రొమాన్స్.. ఫన్. అయితే ఈ లోగా అనుకోని ట్విస్ట్. అసలు సావిత్రికు పెళ్లవుతుందా.. రిషి.. ఎలా తను ఇష్టపడ్డ ఆమెను దక్కించుకున్నాడు వంటి విషయాలు తెలుసుకోవాలంటే సినిమా చూడాల్సిందే. 

పాత చిత్రాల పంథాలోనే ఈ చిత్ర కథ కూడా సాగిపోయింది. కానీ ఇదే హీరో గతంలో సోలో అంటూ దాదాపు ఇలాంటి ట్రీట్మెంట్‌తో సినిమా చేశాడని మర్చిపోయినట్లున్నారు. లేదా జనం మర్చిపోతారులే అనుకున్నాడో ఏమో తెలియదు కానీ చిత్రం మాత్రం పెద్ద ఆసక్తి లేకుండా సరదాగా తీశారు. విలన్, హీరోయిన్ క్యారక్టరైజేషన్ వంటివి కొత్త కథ అనిపించినా ట్రీట్మెంట్ ముఖ్యంగా స్క్రీన్ ప్లే మాత్రం పాతగా ఉంది. పాటలు జస్ట్ ఓకే.. వింటున్నంత సేపూ బాగానే ఉన్నట్లు అనిపిస్తుంది కానీ గుర్తుండదు.