తమిళ హీరో విజయ్ నటిస్తున్న తాజా చిత్రం సర్కార్. ఈ చిత్రానికి ఏఆర్ మురుగదాస్ దర్శకత్వం వహించారు. ఈ చిత్రం దీపావళి సందర్భంగా ప్రేక్షకుల ముందుకురానుంది. ఇటీవల విడుదల చేసిన సర్కార్ టీజర్‌కు ప్రేక్షకుల నుంచి విశేష స్పందన లభించింది. తెలుగు, తమిళంలో విడుదలైన ప్రచార చిత్రాలు 'సర్కార్' చిత్రంపై అంచనాలను రెట్టింపు చేశాయి.
ఈ సందర్భంగా తెలుగులో వంశీ వల్లభనేని ఈ చిత్రాన్ని విడుదల చేస్తున్నారు. సుమారు 750కుపైగా థియేటర్లలో దీపావళి కానుకగా ఈ చిత్రాన్ని విడుదల చేస్తున్నట్లు వంశీ తెలిపారు. ప్రస్తుత రాజకీయాలపై ఓ కార్పొరేట్ వ్యాపారి ఎలాంటి పోరాటం చేశాడనే కథాంశంతో తెరకెక్కిన ఈ చిత్రంలో వరలక్ష్మి శరత్ కుమార్ కీలక పాత్ర పోషించారు.
మరోవైపు, ఈ సినిమా కథ తనదంటూ రచయిత వరుణ్ రాజేంద్రన్‌ పోలీసులకు ఫిర్యాదు చేశారు. ఈ మేరకు ఆయన మద్రాస్ హైకోర్టును ఆశ్రయించారు. దీనిపై తాజాగా దర్శకుడు మురుగదాస్ మాట్లాడారు. 'దక్షిణ చిత్ర పరిశ్రమ రచయితల సంఘం అధ్యక్షుడు భాగ్యరాజ్‌ కేవలం వరుణ్ తరపు వాదననే విన్నారు. మమ్మల్ని కలవలేదు. ఆయన చేసింది చాలా పెద్ద తప్పు. ఈ చిత్ర కథ తెలుసుకోకుండా ఓ నిర్ణయానికి రావడం సబబు కాదన్నారు.
ముఖ్యంగా, వరుణ్ కథకు, నా కథకు ఉన్న పోలిక ఒక్కటే. ఇద్దరి కథలు ఓట్లను ఎలా దుర్వినియోగం చేశారు? అన్న నేపథ్యంలో ఉంటాయి. వరుణ్ రాసుకున్న కథలో కీలక అంశాలు లేవు. కానీ నా కథలో ఈ మధ్యకాలంలో రాజకీయాల్లో చోటుచేసుకున్న సన్నివేశాలన్నీ చూపించాం. తమిళనాడు మాజీ ముఖ్యమంత్రి జయలలిత గురించి కూడా ప్రస్తావించాం. వరుణ్ 2007లో కథ రాసుకున్నారు. అలాంటప్పుడు జయలలిత మరణం గురించి అందులో ఎలా ప్రస్తావిస్తారు? ఈ ఘటన నన్ను చాలా బాధించింది. నా గుండె పగిలినంత పనైంది అని చెప్పుకొచ్చారు.