మొబైల్‌లో హల్‌చల్ చేస్తున్న విజయ్ దేవరకొండ 'టాక్సీవాలా'

టాలీవుడ్ సంచలనం విజయ్ దేవరకొండ తాజా చిత్రం "టాక్సీవాలా". ఈ చిత్రం షూటింగ్ పూర్తయింది. కానీ, విడుదల విషయంలో తీవ్ర జాప్యం జరుగుతోంది. ఇప్పటికే పలుమార్లు వాయిదాపడింది కూడా.

టాలీవుడ్ సంచలనం విజయ్ దేవరకొండ తాజా చిత్రం "టాక్సీవాలా". ఈ చిత్రం షూటింగ్ పూర్తయింది. కానీ, విడుదల విషయంలో తీవ్ర జాప్యం జరుగుతోంది. ఇప్పటికే పలుమార్లు వాయిదాపడింది కూడా. ఈ నేపథ్యంలో ఈ చిత్రానికి సంబంధించిన కొన్ని సీన్లు మొబైల్‌లో లీకయ్యాయి. 

నిజానికి విజయ్ దేవరకొండ నటించిన 'గీత గోవిందం' సినిమా పైరసీ బారిన పడిన విషయం తెల్సిందే. అదేసమయంలో ఆయన మరో చిత్రం 'టాక్సీవాలా' పైరసీకి గురైందన్న వార్తలు వచ్చాయి. ఇప్పుడా వార్తలు నిజమేనని తేలింది. 

పశ్చిమ గోదావరి జిల్లా దేవరపల్లిలో కొందరు యువకులు మొబైల్ ఫోన్లలో 'టాక్సీవాలా' చూస్తుండగా పోలీసులు అదుపులోకి తీసుకున్నారు. ఆ సినిమా వారి మొబైల్స్‌లోకి ఎలా వచ్చింది? వారు ఎవరెవరికి ఫార్వార్డ్ చేశారన్న కోణంలో విచారణ సాగిస్తున్నట్టు పోలీసు వర్గాలు వెల్లడించాయి. 

విజయ్ దేవరకొండ సరసన మాళవికా నాయర్, ప్రియాంకలు నటించిన ఈ చిత్రం చానాళ్ల క్రితమే విడుదలకు సిద్ధమైనా, పలు కారణాలతో వాయిదా పడుతూ వస్తున్న సంగతి తెలిసిందే. కాగా, విజయ్ దేవరకొండ నటించిన మరో తాజా చిత్రం నోటా వచ్చే నెల ఐదో తేదీన ప్రేక్షకుల ముందుకురానుంది.