గద్దలకొండ గణేష్ (వాల్మీకి) ప్రపంచ వ్యాప్తంగా విడుదలైంది. కోలీవుడ్‌లో సిద్ధార్థ్ హీరోగా తెరకెక్కి హిట్ అయిన ఈ సినిమాను హరీష్ శంకర్ రీమేక్ చేశారు. ముందుగా వాల్మీకి అనే టైటిల్‌తో తెరకెక్కిన ఈ సినిమాపై కొన్ని కులాలు టైటిల్ మార్చాలన్న అభ్యంతరం పెట్టాయి. దీంతో రిలీజ్‌కు ముందు రోజు వాల్మీకి కాస్త గద్దల కొండ గణేష్‌గా మార్చింది యూనిట్‌.
ఈ సినిమాలో గద్దల కొండ గణేష్‌గా వరుణ్ తేజ్ నటించాడు. అధర్వ మురళీ, పూజా హెగ్డే ఈ చిత్రంలో కీలక పాత్రల్లో కనిపించారు. ఈ సినిమా విడుదలైన తొలి రోజే కలెక్షన్ల వర్షం కురిపించింది. ముఖ్యంగా నైజాం ఏరియాలో ఈ చిత్రం మొదటి రోజు రికార్డు స్థాయి వసూళ్లు సాధించింది. నైజాంలో గద్దలకొండ గణేష్ మొదటిరోజు 1.7కోట్ల షేర్ సాధించి అబ్బురపరిచింది. ఈ మొత్తం వరుణ్ తేజ్ కెరీర్ బెస్ట్ కావడం విశేషం.
అలాగే ఈ చిత్రం ఓపెన్సింగ్స్ అదిరిపోవడంతో ప్రపంచ వ్యాప్తంగా రూ.6.81 కోట్ల షేర్ రాబట్టింది. ఇక తెలుగు రాష్ట్రాల్లో రూ 5.81 కోట్లు రాబట్టింది. ఇక ఈ సినిమా తొలి రోజు వసూళ్లు చూస్తే బాక్సాఫీస్ దగ్గర మరింతగా దూసుకుపోవడం ఖాయంగా కనిపిస్తోంది. వరుణ్ కెరీర్‌లో మరో మంచి హిట్ పడినట్టేనని సినీ పండితులు అంటున్నారు.