మెగా పవర్ స్టార్ రామ్ చరణ్ నటించిన తాజా చిత్రం "వినయ విధేయ రామ". ఈ చిత్రం సంక్రాంతికి ప్రేక్షకుల ముందుకు వచ్చింది. ఈ సినిమా నెగెటివ్ టాక్ వచ్చినప్పటికీ కలెక్షన్ల పరంగా దూసుకెళుతోంది. ఈ చిత్రం ఫెయిల్యూర్‌పై ప్రముఖ సినీ దర్శకనిర్మాత తమ్మారెడ్డి భరద్వాజా స్పందించారు.
రామ్ చరణ్ నటించిన "రంగస్థలం" వంటి బ్లాక్ బస్టర్ హిట్ తర్వాత వచ్చిన చిత్రం 'వినయ విధేయ రామ' కావడంతో ఈ చిత్రంపై భారీ అంచనాలే నెలకొన్నాయి. ఈ చిత్రం తొలి భాగం బాగానే ఉన్నప్పటికీ.. రెండో అర్థభాగం మాత్రం పూర్తి ఫైట్లతో నింపివేశారనీ, ఇదే పెద్ద మైనస్ పాయింట్‌ అని, ఈ కారణంగానే అభిమానులు అసంతృప్తికి లోనయ్యారని చెప్పారు.
ఇకపోతే, సంక్రాంతికి రిలీజ్ అయిన మరో రెండు చిత్రాలపై కూడా ఆయన స్పందించారు. 'ఎన్టీఆర్ కథానాయకుడు' చిత్రం తొలి భాగం బాగానే ఉన్నప్పటికీ రెండో భాగంపై మరింత శ్రద్ధ చూపించివుంటే బాగుండేదని ఆయన వెల్లడించారు.
మూడో చిత్రం ఫ్యామిలీ డ్రామాకి కామెడీ కూడా తోడుకావడంతో "ఎఫ్-2" సినిమా బాగా ఆడుతోందన్నారు. సక్సెస్ .. ఫెయిల్యూర్ అనేవి ఎప్పుడూ ఒకచోట వుండవు. ఎవరి ప్రయత్నం వాళ్లు చేశారంతే అని చెప్పుకొచ్చారు.