టీవీ లైవ్‌లో బోరున విలపించిన శ్రీదేవి... వీడియో

'అతిలోక సుందరి' శ్రీదేవి టీవీ లైవ్‌షోలో బోరున విలపించింది. ఈనెల ఏడో తేదీనతో వెండితెర అరంగేట్రం చేసి అర శతాబ్దాన్ని పూర్తి చేసుకుంది. ఈ సందర్భంగా ఆమె నటించిన తాజా చిత్రం "మామ్" అదే రోజున విడుదల చేశారు.

'అతిలోక సుందరి' శ్రీదేవి టీవీ లైవ్‌షోలో బోరున విలపించింది. ఈనెల ఏడో తేదీనతో వెండితెర అరంగేట్రం చేసి అర శతాబ్దాన్ని పూర్తి చేసుకుంది. ఈ సందర్భంగా ఆమె నటించిన తాజా చిత్రం "మామ్" అదే రోజున విడుదల చేశారు. బాక్సాఫీస్ వద్ద ఆ సినిమాను ప్రేక్షకులు ఆదరిస్తున్నారు. ఆసాంతం భావోద్వేగాలతో సాగే ఆ సినిమాలో శ్రీదేవి అసాధారణ నటనను కనబరిచారంటూ ప్రేక్షకులు ప్రశంసల వర్షం కురిపిస్తున్నారు. అదేసమయంలో చిత్రం హిట్ కావడంతో చిత్ర యూనిట్ ప్రమోషన్ కార్యక్రమాలను నిర్వహిస్తోంది. ఈ సందర్భంగా శ్రీదేవి తీవ్రమైన భావోద్వేగానికి గురయ్యారు. లైవ్‌లోనే బోరున విలపించారు.

ఈ సందర్భంగా శ్రీదేవి మాట్లాడుతూ... 'సాజల్.. నా తల్లి ఐ లవ్యూ. నేను ఎందుకు ఇంతలా ఉద్వేగానికి గురవుతున్నానో అర్థం కావట్లేదు. సాజల్, అద్నాన్ లేకుండా ఇంత మంచి సినిమా సాధ్యమయ్యేదే కాదు. ఇంత మంచి విజయం సాధించి ప్రమోషన్లు నిర్వహిస్తున్న సందర్భంలో మీరు లేకపోవడం చాలా బాధిస్తోంది. మిమ్మల్ని మిస్సవుతున్నాను. సాజల్ నువ్వు ఈ సినిమాలో నటించిన తీరు నిజంగా అద్భుతం. నువ్వులేని ఈ సినిమా నిజంగా అసంపూర్ణం. ఈ క్షణం చాలా ప్రత్యేకమైనది. దీనికోసమే అంతా చూస్తున్నాం' అంటూ శ్రీదేవి కన్నీటి పర్యంతమయ్యారు. ఆ వీడియోను ఓ అభిమాని యూట్యూబ్‌లో అప్‌లోడ్ చేశారు.

సాజల్‌తో శ్రీదేవి అంతలా కనెక్ట్ కావడానికి ఓ కారణం ఉంది. మామ్ చిత్రంలో సాజల్.. శ్రీదేవి కుమార్తెగా నటించింది. షూటింగ్‌లో అత్యంత చేరువైన సాజల్ అలీతో.. శ్రీదేవి అమ్మకన్నా ఎక్కువైన బంధాన్నే ఏర్పరచుకుందట. కానీ, ఈ చిత్రం ప్రమోషన్లలో యూనిట్ అంతా పాల్గొంటున్నా.. సినిమాలో భాగమైన సాజల్ అలీ, పాకిస్థాన్‌కు చెందిన మరో నటుడు అద్నాన్ సిద్ధిఖీ హాజరు కాలేకపోయారు. అదే శ్రీదేవిని బాధపెట్టిందట. ఈ విషయాన్నే శ్రీదేవి వెల్లడిస్తూ బోరున విలపించింది.