బాలీవుడ్ దర్శకుడు సాజిద్ ఖాన్‌పై ప్రముఖ మోడల్ పాలా సంచలన ఆరోపణలు చేసింది. బాలీవుడ్ ఇండస్ట్రీలోకి అడుగుపెట్టేందుకు తాను ఎదుర్కొన్న వేధింపులపై తాజాగా ఆమె నోరు విప్పింది. ఇందులో దర్శకుడు సాజిద్ ఖాన్‌ను లక్ష్యంగా చేసుకుని ఆరోపణలు గుప్పించింది. సినిమాల్లో నటించే అవకాశం కావాలంటే తన ముందు దుస్తులు విప్పేయాలని ఆయన ఒత్తిడి చేశాడని పేర్కొంది. ఈ వేధింపులన్నీ 17 యేళ్ల ప్రాయంలోనే అనుభవించినట్టు ఆమె వెల్లడించింది.
ఇదే అంశంపై ఆమె తాజాగా మాట్లాడుతూ, 'మీటూ ఉద్యమం' జరిగే సమయంలో చాలా మంది అమ్మాయిలు సాజిద్ ఖాన్ వేధించాడ‌ని ఆరోపించారు. కానీ నేను చెప్పే ధైర్యం చేయ‌లేకపోయాను. ఎందుకంటే ఎలాంటి సినీ బ్యాక్ గ్రౌండ్ లేకుండా సినీ ప‌రిశ్ర‌మ‌కు వ‌చ్చిన యాక్ట‌ర్ల‌లో నేను కూడా ఒక‌రిని. కుటుంబ స‌భ్యుల‌ను పోషించే బాధ్య‌త నాపై ఉండ‌టంతో మౌనంగా ఉండిపోవాల్సి వచ్చింది.
ముఖ్యంగా, 17 ఏళ్ల ప్రాయంలో ఉన్న‌పుడు సాజిద్ ఖాన్ నన్ను తాకేందుకు ప్ర‌య‌త్నించాడు. 'హౌస్‌ఫుల్‌'లో నటించే అవకాశం ఇవ్వాలంటే.. తన ముందు దుస్తులు విప్పాల‌ని అడిగాడు. సాజిద్ ఇలా ఎంత‌మంది అమ్మాయిల‌తో ప్ర‌వ‌ర్తించాడో ఆ దేవుడికే తెలియాలి.
సానుభూతి కోసం ఈ విషయాలు ఇపుడు వెల్లడించడం లేదన్నారు. ఇలాంటి క్రూర‌మైన స్వ‌భావ‌మున్న వ్య‌క్తులు క‌టాక‌టాల్లోకి పంపించాలని పాలా డిమాండ్ చేసింది. కాగా మోడల్ పాలా చేసిన ఆరోపణలు ఇపుడు బి టౌన్‌లో హాట్ టాపిక్‌గా మారాయి.