హీరో ప్రభాస్‌కు అమెరికాలో ఆపరేషన్... ఎందుకు?

టాలీవుడ్ మోస్ట్ బ్యాచిలర్ ప్రభాస్‌కు అమెరికాలో ఆపరేషన్ జరుగనుంది. దీంతో ఆయన అభిమానాలు ఆందోళన చెందుతున్నారు. తమ హీరో ఎందుకు ఆపరేషన్ చేయించుకుంటున్నారంటూ ప్రశ్నిస్తున్నారు. ఈ వివరాలను పరిశీలిస్తే, నిజానికి ప్రభాస్ ఎప్పటి నుంచో మోకాలి నొప్పితో బాధ పడుతున్నారు. కొన్నాళ్లుగా ఆయన సరిగా నడవలేకపోతున్నారని, పోరాట సన్నివేశాల్లో పాల్గొన్నప్పుడు మరింత ఇబ్బంది పడుతున్నారని ఆయన సన్నిహితులు అంటున్నారు. 

దీనికోసం కొంతకాలం ఆయుర్వేదం చికిత్స కూడా తీసుకున్నారు. ఆ తర్వాత వైద్యుల సూచన మేరకు విదేశాల్లో చికిత్స తీసుకున్నప్పటికీ అది తాత్కాలిక ఉపశమనం మాత్రమే కలిగించిందట. అందుకే శాశ్వత పరిష్కారం కోసం ఆపరేషన్ చేయించుకోవాలని భావిస్తున్నారు. అందుకోసం త్వరలోనే ప్రభాస్ అమెరికా వెళ్లబోతున్నారని తెలుస్తోంది. 

ఈ ఆపరేషన్ చేయించుకొంటే కనీసం 3 నెలల విశ్రాంతి తప్పని సరి. అందుకే చేతిలో ఉన్న సినిమాల్ని పూర్తి చేసి, అప్పుడు సర్జరీ కోసం అమెరికాకు వెళ్లాలని ఆయన భావిస్తున్నారు. ప్రభాస్ పూర్తి చేయాల్సిన ప్రాజెక్టుల్లో 'సలార్', 'కల్కి' ఉన్నాయి. ఈ అక్టోబరులోగా ఈ రెండు చిత్రాలకు సంబంధించిన షూటింగులు పూర్తయ్యే అవకాశాలు ఉన్నట్టు టాలీవుడ్ వర్గాల సమాచారం. 

ఆ తర్వాత ప్రభాస్ ఆపరేషన్ చేయించుకొని, మూడు నెలలు విశ్రాంతి తీసుకొంటే, 2024 ప్రధమార్థంలో మళ్లీ షూటింగులతో బిజీ అవుతారు. ప్రభాస్ కోలుకొన్న తర్వాత మారుతి సినిమాతో పాటుగా, సందీప్ రెడ్డి వంగా చిత్రాన్నీ పట్టాలెక్కించే అవకాశం ఉన్నట్టు టాలీవుడ్ వర్గాల సమాచారం.