నంద‌మూరి తార‌క రామారావు జీవిత క‌థ ఆధారంగా రూపొందుతోన్న ఎన్టీఆర్ చిత్రం శ‌ర‌వేగంగా షూటింగ్ జ‌రుపుకుంటోంది. బాలకృష్ణ ప్రధాన పాత్రలో నటిస్తున్న ఎన్టీఆర్ బయోపిక్ చిత్రం షూటింగ్ తుది దశకు చేరుకుంది. జాగ‌ర్ల‌మూడి క్రిష్ ప‌క్కా ప్లాన్‌తో ఈ సినిమాని తెర‌కెక్కిస్తున్నారు. స్వ‌ర‌వాణి కీర‌వాణి సంగీతం అందిస్తున్నారు. ఇక ఈ చిత్రం యొక్క ఆడియో వేడుకను డిసెంబర్ 16న తిరుపతిలో గ్రాండ్‌గా నిర్వ‌హించేందుకు ప్లాన్ చేస్తున్నారు. ఈ వేడుకకు సినీ రాజకీయ ప్రముఖులు హాజరు కానునున్నారు.
ఈ చిత్రం రెండు భాగాలుగా రానుంది. దాంట్లో మొదటి భాగం కథానాయకుడు వచ్చే ఏడాది సంక్రాంతి కానుకగా జనవరి 9న విడుదల కానుంది. ఈ మొదటి భాగంలో ఎన్టీఆర్ సినీ జీవితాన్ని చూపించనున్నారు. విద్యాబాలన్, సుమంత్, రానా, నిత్య మీనన్, రకుల్ ప్రీత్ సింగ్ తదితరులు ముఖ్య పాత్రల్లో నటిస్తున్నారు. ఎన్.బి.కె ఫిలిమ్స్, వారాహి ప్రొడక్షన్స్, విబ్రి మీడియా సంయుక్తంగా ఈ చిత్రాన్ని నిర్మిస్తున్నాయి. రిలీజ్‌కి ముందే ఈ సినిమా సెన్సేష‌న్ క్రియేట్ చేస్తుంది. మ‌రి... రిలీజ్ తర్వాత ఎలాంటి ఎంత‌టి సంచ‌ల‌నం సృష్టించ‌నుందో చూడాలి.