నిధి అగర్వాల్‌కు లక్కీ ఛాన్స్... ఏంటది?

ఇస్మార్ట్ శంకర్ బ్యూటీ నిధి అగర్వాల్‌ లక్కీ ఛాన్స్ కొట్టేసింది. పవర్ స్టార్ పవన్ కళ్యాణ్ సరసన నటించే అవకాశాన్ని దక్కించుకున్నట్టు హైదరాబాద్ ఫిల్మ్ నగర్ వర్గాల సమాచారం. 

ఈ ముద్దుగుమ్మ తెలుగు సినీ ఇండస్ట్రీకి సవ్యసాచి అనే చిత్రం ద్వారా అడుగుపెట్టింది. ఈ చిత్రం పూర్తిగా నిరాశపరిచింది. ఆ తర్వాత పూరి జగన్నాథ్ - రామ్ కాంబినేషన్‌లో వచ్చిన ఇస్మార్ట్ శంకర్ ఈ అమ్మడు రేంజ్‌ను ఒక్కసారిగా పెంచేసింది. ఇదే ఆమెకు తొలి విజయం. 

ఈ క్రమంలో తాజాగా ఈ ముద్దుగుమ్మ పవర్ స్టార్ పవన్ కల్యాణ్ సరసన నటించే బిగ్ ఆఫర్‌ను అందుకున్నట్టు వార్తలొస్తున్నాయి. క్రిష్ దర్శకత్వంలో పవన్ కల్యాణ్ హీరోగా ఓ పిరీడ్ సినిమా తెరకెక్కుతోంది. ఇటీవలే హైదరాబాదులో ఈ చిత్రం రెగ్యులర్ షూటింగు కూడా మొదలైంది. 

ఈ చిత్రంలో నిధి అగర్వాల్ ఓ కథానాయికగా నటించే అవకాశాన్ని సొంతం చేసుకుందని తెలుస్తోంది. ఇప్పటికే ఈమె ఈ చిత్రం షూటింగులో కూడా పాల్గొందని అంటున్నారు. ఈ సినిమాలో మరో కథానాయికగా బాలీవుడ్ తార జాక్వెలిన్ ఫెర్నాండెజ్ నటిస్తుందని సమాచారం.