హ్యాట్రిక్ ఫ్లాప్ కొట్టావ్.. ఈసారైనా స‌క్స‌ెస్ సాధిస్తావా నితినా..?
శుక్రవారం, 21 జూన్ 2019 (19:42 IST)
యువ హీరో నితిన్ న‌టించిన లై, ఛ‌ల్ మోహ‌న రంగ, శ్రీనివాస క‌ళ్యాణం... ఇలా వ‌రుస‌గా మూడు సినిమాలు హ్యాట్రిక్ ఫ్లాప్ అవ్వ‌డంతో కెరీర్లో బాగా వెన‌క‌బ‌డ్డాడు. దీంతో కొన్ని రోజులు ఆలోచ‌న‌లో ప‌డి ఏ సినిమాని ఓకే చేయ‌లేదు. ఆఖ‌రికి ఈసారి ఎలాగైనా స‌రే... స‌క్స‌స్ సాధించాల‌నే ప‌ట్టుద‌ల‌తో క‌థ‌ల విష‌యంలో చాలా కేర్ తీసుకున్నాడు.
చాలా కథలు విని ఆఖ‌రికి ఛ‌లో ఫేమ్ వెంకీ కుడుమ‌ల‌తో భీష్మ సినిమా చేయ‌డానికి అంగీక‌రించాడు. ఈ సినిమాని ఎప్పుడో ఎనౌన్స్ చేసారు కానీ.. కొన్ని కార‌ణాల వ‌ల‌న సెట్స్ పైకి వెళ్ల‌డం ఆల‌స్యం అయ్యింది. ఈ చిత్రంలో నితిన్ స‌ర‌స‌న ర‌ష్మిక న‌టిస్తుంది. ఎట్ట‌కేల‌కు భీష్మ షూటింగ్ ప్రారంభించారు.
ఈ సంద‌ర్భంగా నితిన్ ట్విట్ట‌ర్లో స్పందిస్తూ... దాదాపు సంవ‌త్స‌రం త‌ర్వాత కెమెరా ముందుకు వచ్చాను. న్యూ డే, న్యూ లుక్, న్యూ క్యారెక్ట‌ర్.. ఈ ప్ర‌యాణం చాలా ఆస‌క్తిక‌రంగా ఉంది. భీష్మ షూటింగ్ బిగిన్స్ అంటూ త‌న సంతోషాన్ని షేర్ చేసుకున్నారు. ఐ యామ్ బ్యాక్ అంటూ కెమెరా ముందుకు వ‌చ్చావు స‌రే... స‌క్స‌స్ సాధిస్తావా నాయ‌నా అంటూ కామెంట్స్ చేస్తున్నారు నెటిజ‌న్లు.