గగన్ నారంగ్‌తో సైరా.. షూటింగ్ టెక్నిక్స్ కోసమేనా...?

ఒలంపిక్స్ కాంస్య పతక విజేత గగన్ నారంగ్‌తో మెగాస్టార్ చిరంజీవి గురువారం సమావేశమయ్యారు. నారంగ్‌ని త‌న ఇంటికి ఆహ్వానించిన చిరు ఆయనతో గంటకు పైగా భేటీ కావడం ఇపుడు చర్చనీయాంశంగా మారింది. 

ప్రస్తుతం చిరంజీవి అత్యంత ప్ర‌తిష్టాత్మ‌కంగా చిత్రం "సైరా నరసింహా రెడ్డి"లో నటిస్తున్నారు. సురేంద‌ర్ రెడ్డి ద‌ర్శ‌క‌త్వంలో రూపొందుతున్న ఈ చిత్రం ఇటీవ‌ల జార్జియాలో షూటింగ్ జ‌రుపుకుంది. ఈ షెడ్యూల్‌లో భారీ యాక్ష‌న్ సీన్స్ తెర‌కెక్కించారు. చిన్న బ్రేక్ త‌ర్వాత హైద‌రాబాద్‌లో త‌దుప‌రి షెడ్యూల్ జ‌ర‌ుగ‌నుంది. 

ఈ నేపథ్యంలో షూట‌ర్ గ‌గ‌న్ నారంగ్‌ని తన ఇంటికి పిలిచి చిరంజీవి చ‌ర్చ‌లు జ‌రిపారు. సైరా చిత్రీక‌ర‌ణ‌ కోసం షూటింగ్‌కి సంబంధించిన ప‌లు టెక్నిక్స్ నేర్చుకోవ‌డానికి గ‌గ‌న్ నారంగ్‌ని త‌న ఇంటికి ఆహ్వానించినట్టు సమాచారం. ఈ విషయాన్ని గగన్ నారంగ్ ట్విట్టర్ ఖాతా ద్వారా వెల్లడించారు. చిరంజీవిని కలవడం చాలా సంతోషంగా ఉందని పేర్కొంటూ సైరాతో దిగిన ఫోటోని షేర్ చేశారు. 

కాగా, వచ్చే ఏడాది స‌మ్మ‌ర్ కానుక‌గా విడుద‌ల కానుండ‌గా, ఇందులో నయనతార, తమన్నా, ప్రగ్యా జైస్వాల్ కథానాయికలుగా నటిస్తుండగా.. అమితాబ్ బచ్చన్, జగపతిబాబు, సుదీప్, విజయ్ సేతుపతి ఇతర ముఖ్య పాత్రలు పోషిస్తున్నారు. బాలీవుడ్ మ్యూజిక్ డైరెక్టర్ అమిత్ త్రివేది ఈ చిత్రానికి సంగీత బాణీలు సమకూర్చుతున్నారు.