పవన్ కల్యాణ్‌తో నటించేందుకు హీరోయిన్లు తారసపడుతున్నారు. పవన్ హీరోయిన్ అనిపించుకోవాలని అందరూ అంతగా తపిస్తున్నారు కానీ... ఇటీవల ఓ భామకి మాత్రం ఎవ్వరూ ఊహించని రీతిలో ఆ అవకాశం లభించింది. దీంతో ఆమె ఆనందానికి అవధుల్లేవు. ఆ కథానాయిక ఎవరో కాదు.. లక్ష్మీరాయ్.
సర్దార్ గబ్బర్ సింగ్ సినిమాలో ఓ ఐటెమ్ పాటకోసం లక్ష్మీరాయ్‌ని ఎంచుకున్న సంగతి తెలిసిందే. ఆ అవకాశం లభించేసరికి ఆమె ఎగిరి గంతేసింది. కాల్షీట్లు సమస్యగా ఉన్నా పవన్ కోసం సర్దుబాటు చేసింది. కొంతకాలం క్రితమే ఆమె ఆ పాటలో ఆడిపాడి తన పార్ట్‌ని పూర్తి చేసుకొని వెళ్లిపోయింది. అయితే ఇప్పుడామెకి మళ్లీ సర్దార్ గబ్బర్ సింగ్ టీమ్ నుంచి పిలుపొచ్చిందట. ఐటెమ్ పాటతో పాటు ఓ పాత్ర కూడా లక్ష్మీరాయ్ కోసం క్రియేట్ చేశారని తెలిసింది. అంతే లక్ష్మీరాయ్ ఎగిరి గంతేసిందట.
సినిమాలో పవన్ సరసన మెయిన్ హీరోయిన్‌గా కాజల్ నటిస్తున్న సంగతి తెలిసిందే. కథ రీత్యా మరో అమ్మాయికి కూడా చోటుందట. ఆ పాత్రకోసం ఎవర్ని ఎంపిక చేసుకుందామా అన్న ఆలోచనలో చిత్రబృందం ఉండగా పవన్ కళ్యాణ్ మాత్రం మళ్లీ లక్ష్మీరాయ్‌నే పిలిపించండని చెప్పాడట. త్వరలోనే ఈ లక్ష్మీరాయ్ సర్దార్ గబ్బర్ సింగ్ టీమ్‌తో జాయిన్ కానున్నట్లు తెలిసింది. పవన్‌కు ఆమె యాక్టింగ్ తెగ నచ్చేయడంతో ఆమెనే ఎంపిక చేసినట్లు తెలుస్తోంది.